पूर्वविजेता भारतले आइसिसी टी–२० विश्वकपअन्तर्गत सुपर एटको समूह १ मा अफगानिस्तानमाथि ४७ रनको सानदार जित निकालेको छ । ब्रिजटाउनमा बिहीबार राति पहिलो ब्याटिङ गरेको भारतले आठ विकेट गुमाएर १८१ रनको योगफल खडा गरेको थियो ।
प्रत्युत्तरमा अफगानिस्तानले २० ओभरमा सबै विकेट गुमाएर १३४ रन मात्र बनायो । भारतको जितमा जसप्रीत बुमराहले चार ओभरमा एक मेडन राखी ७ रन खर्चेर तीन विकेट लिए ।
अश्रदीप सिंहले चार ओभरमा तीन विकेट लिन ३६ रन खर्चेका थिए । अफगानिस्तानको इनिङ्समा अजमतुल्लाह अमाजीले २० बलमा २६ रनको योगदान दिएका थिए । भारतले १९ अतिरिक्त रन दिएको थियो ।
यसअघि पहिलो ब्याटिङ गरेको भारतका लागि मध्यक्रमका खेलाडीले उत्कृष्ट ब्याटिङ गरेका थिए । कप्तान रोहित शर्मालाई ८ रनमा गुमाएको भारत त्यसपछिका ब्याट्सम्यानबीच राम्रो साझेदारीका कारण सम्हालिएको थियो । विराट कोहली र ऋषभ पन्तबीच दोस्रो विकेटका लागि २५ बलमा ४३ रनको साझदोरी भएको थियो । दुवैले भारतलाई ११–१ बाट ५४–२ को स्थितिमा राखे । कोहलीले २४ बलमा २४ रन बनाए ।
त्यसपछि सूर्यकुमार यादव र शिवम दुबेबीच चौथो विकेटका लागि १४ बलमा २८ रनको साझेदारी भयो । सूर्यकुमार र हार्दिक पाण्ड्याबीच पाँचौँ विकेटका लागि ३७ बलमा ६० रनको साझेदारी भएको थियो । यी आक्रामक साझेदारीका कारण नै भारतले अफगानिस्तानलाई बलियो लक्ष्य दिएको हो । सूर्यकुमारले २८ बलमा तीन छक्का र पाँच चौका प्रहार गरी ५३ रन बनाए । पाण्ड्याले २४ बलमा तीन चौका र दुई छक्काको सहयोगमा ३२ रन जोडे ।
यसैगरी, समूह २ मा वेस्ट इन्डिजमाथि साबिक विजेता इंग्ल्यान्डले आठ विकेटको जित निकालेको थियो । पहिलो ब्याटिङ गरेको वेस्ट इन्डिजले २० ओभरमा चार विकेट गुमाएर १८० रन बनायो । इंग्ल्यान्डले १७.३ ओभरमा दुई विकेटको नोक्सानीमा १८१ रन जोड्यो । इंग्ल्यान्डको सानदार जितमा फिल साल्टले ४७ बलमा सात चौका र पाँच छक्का प्रहार गरी सर्वाधिक ८७ रन बनाए । जोनी वेरिस्टोले २६ बलमा पाँच चौका र दुई छक्का प्रहार गरी ४८ रन जोडे ।
