नारायणी अस्पतालमा औषधि आपूर्ति गर्दै आएको सप्लायर्स कम्पनीले म्याद सकिन नजिक रहेको औषधि आपूर्ति गरेको अस्पतालको फार्मेसीमा भेटिएको छ । अस्पतालमा चालू आर्थिक वर्ष ०८०/८१ मा औषधि आपूर्ति गर्ने ठेक्का पाएको पर्सा साइन्स कम्पनी, एस.आर सप्लायर्स र साक्षी मेडिकलले अस्पतालमा म्याद सकिन नजिक रहेको औषधि आपूर्ति गरेको पाइएको हो ।
अस्पतालले खरिद गर्दै आएको औषधिको म्याद सकिन अन्तिम अवस्था पुगेपछि सस्तोमा पाउने गरेको कर्मचारी स्रोतले जनाएको छ । स्रोतका अनुसार करिब ६ महिना म्याद बाँकी रहँदा कर्मचारीको मिलोमतोमा म्याद सकिन नजिकको औषधि खरिद गरिएको हो ।
अस्पतालको फार्मेसीमा राखिएको ड्रोलाइट नामक औषधिको म्याद सन् २०२४ जुलाई २४ सम्म मात्र रहेको छ । जब कि औषधिको म्याद सक्नुभन्दा तीन महिनाअगाडिनै यो औषधि आपूर्ति गर्ने सप्लायर्स कम्पनीले फिर्ता लैजानुपर्ने प्रावधान छ। तर, यो औषिको म्याद अब दुई महिनाभन्दा पनि कम रहेको अवस्था छ ।
अधिकांश औषधिको म्याद सकिन अब तीन महिनादेखि पाँच महिना मात्र रहेको अवस्थामा फार्मेसीमा देखिएको छ ।
फार्मेसीमा अहिले डोटाभ ४० को सेप्टेम्बरमा, क्लाइब्याक्ट ३०० को सेप्टेम्बरमा, एरटेन ए को डिसेम्बरमा, जेनोसार ४०० डिसेम्बरमा र स्पारोलक १२५ को अगस्टमा म्यादमा सकिन थालेको छ ।
अस्पतालको फार्मेसीमा करिब ६ महिनादेखि नौ महिनाको म्याद भएको औषधि खरिद गर्न थालिएको अस्पतालका कर्मचारीले बताए । उनीहरूका अनुसार अस्पतालमा केही कर्मचारीहरूले कमिसनको चक्करमा औषधि सप्लायर्स कम्पनीसँग मिलेर आर्थिक मिलोमतो गर्ने गरेका छन् । यस्तै, अस्पताल डायलाइसिस गर्ने समयमा प्रयोग हुने केमिकल पनि स्टोर शाखामा राखिएको अवस्था छ ।
स्वास्थ्यजस्तो संवेदनशील क्षेत्रमा अधिकांश औषधि अहिले पनि जताजतै फालिएको छ । डायलाइसिसमा प्रयोग गर्ने केमिकलमा पनि आफैँ हातले लेखेर औषधिको म्याद थप गरिएको छ । अस्पतालको स्टोर शाखाका अनुसार चालू आर्थिक वर्ष ०८०/८१ मा औषधि आपूर्ति गर्न साक्षी मेडिकलमा एक लाख १८ हजार नाै सय ९५ रकमबराबरको, एसआर सप्लायर्सले १५ हजार एक सय ५० हजार रकमबराबरको र पर्सा साइन्स कम्पनीले पहिलो चरणमा १२ लाख ९४ हजार चार सय ४२ रुपैयाँमा ठेक्का साकार गरेको थियो । यस्तै, दोस्रो चरणमा पनि पर्सा साइन्स कम्पनीले ६३ लाख ७४ हजार तीन सय ७५ रकमको ठेक्का पाएको हो ।
आवश्यक औषधि फार्मेसीमा पाउँदैनन् बिरामी
सरकारले आधारभूत स्वास्थ्य सेवामा आधारित स्तरीय उपचार पद्धति (स्ट्यान्डर्ड ट्रिटमेन्ट प्रोटोकल) अनुसार आधारभूत अस्पताल/प्राथमिक स्वास्थ्य केन्द्र, आधारभूत स्वास्थ्य केन्द्र, जिल्ला र प्रादेशिक अस्पतालबाट ९८ प्रकारका औषधि निःशुल्क पाइने व्यवस्था छ ।
तर, सरकारले निःशुल्क दिने ९८ प्रकारका औषधि सरकारी स्वास्थ्य संस्थामा पाइँदैन, बिरामीले किन्नुपर्छ । अहिले दिनहुँ नारायणी अस्पतालमा पुगेका बिरामी औषधि नपाएर फर्किएको धेरै उदाहरण छन् । बुधबार अस्पतालमा उपचारका लागि पुगेका वीरगन्जका श्यामप्रसाद साहले अस्पतालको स्टोरमा औषधि लुकाएर बिरामीलाई बाहिरको फार्मेसीमा किन्न लगाउने गरेको अवस्था रहेको बताए ।
उनले अस्पतालको स्टोरमा औषधि राख्ने, तर फार्मेसीमा औषधि छैन भनेर बिरामीलाई बाहिरबाट औषधि किन्न लगाउने गरेको बताए ।
