नेपाल प्रहरीका महानिरीक्षक वसन्तबहादुर कुँवरले सहयोग नगरेको आभास पाएपछि कृष्णबहादुर महरालाई पक्राउ गरेको स्पष्ट पारेका छन् ।
राज्यव्यवस्था तथा सुशासन समितिको आजको बैठकमा सांसदहरूले सोधेका जिज्ञासाको जवाफ दिँदै महानिरीक्षक कुँवरले बयान सकेपछि स्वास्थ्यको जटिलता हेरेर छाडिएको जानकारी दिए ।
‘भेप केसमा सुरुदेखि नै आएको थियो । पछि जाँचबुझ आयोगको प्रतिवेदन आएपछि कार्यान्वयन गर्ने सिलसिलामा प्रधानमन्त्रीज्यू, गृहमन्त्रीज्यूसमेत बस्यौँ र कानुनी दायरामा ल्याउनुपर्छ भन्नेमा गयौँ । उहाँको स्वास्थ्य अवस्थाको कारण ‘लिवरल’ नै हुने कुरा गरेका थियौँ । तर, उहाँले हामीलाई सहयोग नगर्ने आभास देखियो । उहाँले पिएसओ र गाडी छाडेर हिँडेपछि पक्राउ गरिएको हो,’ महानिरीक्षक कुँवरले भने ।
उनले अदालतले समेत स्वास्थ्य अवस्थाको कुरा उठाएको तथा हामीलाई पनि थुनामा राख्दा स्वास्थ्यका अरू जोखिम होला कि भन्ने लागेपछि बयान सकेर रिहा गरिएको बताए ।
