नेपाल राष्ट्रिय पुरुष टोली र आयरल्यान्ड ‘ए’बीचको अन्तर्राष्ट्रिय टी–२० शृंखला सोमबारबाट सुरु हुँदै छ । त्रिवि क्रिकेट मैदानमा सोमबार नेपालले आयरल्यान्डको ‘ए’ टोलीको सामना गर्दै छ । शृंखलाको दोस्रो खेल मंगलबार हुनेछ । त्यसपछि आयरल्यान्डको ‘ए’ टोलीले नेपालको ए टिमसँग टी–२० र एकदिवसीय शृंखला खेल्ने तालिका छ ।
समग्रमा टेस्ट राष्ट्र आयरल्यान्डको ए टोलीले नेपालमा ८ खेल खेल्नेछ । नेपालको नेतृत्व रोहितकुमार पौडेलले गर्नेछन् । सिनियर टिमबाट खेल्दै आएका सोमपाल कामी, अनिल शाह, कुशल भुर्तेल, आसिफ शेख, करण केसी, कुशल मल्ल, गुल्सन झा, आकाश चन्द, अभिनाश बोहरा, सन्दीप जोरा, ललितनारायण राजवंशीले आयरल्यान्डविरुद्ध खेल्नेछन् ।
आइसिसी टी–२० विश्वकपअघि नेपालले यस खेललाई तयारीका रूपमा लिएको छ । नेपालले लगातार चार फाइनल गुमाएको छ । नेपाल पछिल्लोपटक नेदरल्यान्ड्स र नामिबियाको शृंखलाको फाइनलमा पराजित भएको थियो । आयरल्यान्डमा सिनियर टोलीबाट खेलिसकेका नौ खेलाडी छन् । टोलीको कप्तानी निल रकले गर्नेछन् । टोलीमा पिटर मुर पनि छन् । उनी सन् २०१४ देखि २०१९ सम्म जिम्बावेबाट खेलेका थिए ।
विनोदको कप्तानीमा टोली घोषणा
विकेटकिपर ब्याट्सम्यान विनोद भण्डारीको कप्तानीमा नेपालको ‘ए’ टोलीले आयरल्यान्डविरुद्ध खेल्नेछ । नेपाल क्रिकेट संघ (क्यान)ले आइतबार विनोदको कप्तानीमा दुई फम्र्याटका लागि टोली घोषणा गरेको हो । विनोदसँगै आरिफ शेख, देव खनाल, बसिर अहमद, कमलसिंह ऐरी र विकाश आग्रीले दुवै टोलीमा मौका पाएका छन् । नेपालले पहिलो ‘ए’ले आयरल्यन्ड ‘ए’सँग चैत १५, १६ र १८ मा टी–२० खेल खेल्नेछ ।
विनोदसँगै आरिफ, बसिर, रसिद, पवन सराफ, लोकेश बम, देव, किरण ठगुन्ना, अर्जुन घर्ती, नारायण जोशी, सागर ढकाल, विपिन खत्री, कमलसिंह, हेमन्त धमी र विकाश छन् । नेपालले एकदिवसीय खेल २१, २३ र २५ चैतमा खेल्नेछ । यस टोलीमा कप्तान विनोदसहित, आरिफ, देव, बसिर, भीम सार्की, साहब आलम, कमलसिंह, अर्जुन कुमाल, विकास, नरेन भट्ट, रञ्जित कुमार, रूपेश सिंह, रिजन ढकाल र श्याम ढकाल (मौसम) छन् ।
