सूर्य नेपाल वेस्टर्न ओपन पहिलो दिन भुवनलाई अग्रता

बिहिबार, १० फागुन, २०८०
डिजिटल संस्करण

भुवन नगरकोटीले सूर्य नेपाल गल्फ टुर २०२३–२४ अन्तर्गत सूर्य नेपाल वेस्टर्न ओपनको पहिलो दिन एक स्ट्रोकको अग्रता लिएका छन् । पोखराको पार–६९ को हिमालयन गल्फ क्लबमा‌ नेपालका पूर्व नम्बर एक प्रोफेसनल गल्फर भुवन तीन अन्डर ६६ को स्कोरमा शीर्ष स्थानमा रहेका हुन् ।

एमेच्योर खेलाडी सद्भाव आचार्य दुई अन्डर ६७ स्कोरमा खेल सकाउँदै दोस्रो स्थानमा छ । रवि खड्का र निरज तामाङले इभन पार ६९ स्कोरका साथ संयुक्त रूपमा तेस्रो स्थानमा छन् । एक ओभर ७० स्कोरसहित धनबहादुर थापा पाँचाैँ स्थानमा रहे । दीपक आचार्य र टंकबहादुर कार्की दुई ओभर ७१ सहित संयुक्त रूपमा छैटौँ स्थानमा रहेका छन् । बलभद्र राई, भुवनकुमार‌ रोक्का, दीपक मगर, दिनेश प्रजापति तथा एमेच्योर सुन्दर राईले तीन ओभर ७२ को‌ स्कोर बनाउँदै संयुक्त रूपमा आठौँ स्थानमाथि कब्जा जमाए । शीर्ष स्थानका भुवनले दोस्रो होलमा बर्डी प्रहार‌ गर्दै फ्रन्ट नाइनमा‌ एक अन्डर ३३ को स्कोर गरे ।

त्यसपछि तीन बर्डी खेलेका उनले एक बोगी खेप्दा ब्याक नाइन दुई अन्डर ३५ को स्कोर गरे । उनले ११औँ, १५औँ र १८औँ होलमा समान एक सट बचाउँदा १२औँ होलमा बोगीको सामना गरेका थिए । सिजनको पहिलो प्रतियोगिता सूर्य नेपाल सेन्ट्रल ओपनको विजेता सद्भावले फ्रन्ट नाइन एक अन्डर ३३ र ब्याक नाइन एक अन्डर ३४ स्कोर गरेका थिए । उनले तेस्रो होलमा बर्डी प्रहार गर्दै फ्रन्ट नाइन बोगी खेपेका थिए । त्यसपछि १२औँ होलमा बोगी खेपेका उनले १३औँ र १५औँ होलमा बर्डी प्रहार‌ गरे ।

यसैगरी पूर्व नम्बर एक प्रोफेसनल गल्फर रविले फ्रन्ट नाइन इभन ३४ स्कोर गरे । उनले ब्याक नाइनमा‌ इभन पार ३५ को स्कोर गरेका थिए । चौथो र आठौँ होलमा बर्डी प्रहार गरेका रविले छैटौँ होलमा डबल बोगी खेपे । 

सुझावित समाचार