कर्णाली प्रदेशको सुर्खेतस्थित वीरेन्द्रनगरमा आयोजना भएको ३४औँ पुरुष भलिबल प्रतियोगितमा पुलिस क्लब च्याम्पियन बनेको छ । बिहीबार भएको फाइनलमा एपिएफलाई ३–१ को सेटमा पराजित गर्दै पुलिसले उपाधि जितेको हो । पुलिसले सुरुको सेट गुमाए पनि त्यसपछिको तीन सेट आफ्नो पक्षमा राख्न सफल भयो । पहिलो सेट एपिएफले २५–२२ ले आफ्नो पक्षमा पारेको थियो । पहिलो सेट गुमाएको पुलिस दोस्रो सेटबाट खेलमा फर्कियो । दोस्रो सेट २५–१९ ले जित्दै पुलिसले खेललाई १–१ सेटको बराबरीमा ल्यायो । पुलिसले तेस्रो सेट २५–१८ ले जित्दै खेलमा २–१ को अग्रता लियो ।
चौथो सेटमा एपिएफको अग्रतालाई पछि पारेर २५–२३ को जित निकाल्दै पुलिस च्याम्पियन बन्न सफल भयो । उपाधिसँगै पुलिसले एक लाख पायो । विभागीय त्रिभुवन आर्मी क्लबलाई ३–१ को सेटमा पराजित गर्दै गण्डकीले तेस्रो स्थान रक्षा ग¥यो । २० पुसबाट सुरु भएको प्रतियोगितामा तीन विभागीय टोलीसँगै सात प्रदेश गरी १० टोलीको सहभागिता थियो ।
रविन सर्वाेत्कृष्ट
च्याम्पियन नेपाल पुलिस क्लबका ओपन स्पाइकर रविन चन्द प्रतियोगिताको सर्वाेत्कृष्ट खेलाडी घोषित भए । सर्वोत्कृष्ट खेलाडी रविनले १० हजार रुपैयाँ प्राप्त गरेका छन् । प्रतियोगिताभर उत्कृष्ट प्रदर्शन गरेका रविनले नेपाल पुलिसकै घाइते खेलाडी आयुष्मा पुनमगरलाई प्रदान गर्ने बताएका छन् । पुलिसका पहल गहतराज उदयीमान खेलाडी घोषित भएका छन् । उनले पाँच हजार रुपैयाँ प्राप्त गरे । विधागततर्फ पुलिसका खेलाडीको वर्चस्व रहयो । कप्तान इम राना सेटर, रविन नगरकोटी ब्लकर, भीम गाहा लिबेरो र चन्द्र कुँवर उत्कृष्ट प्रशिक्षक चुनिए । एपिएफका हेमन्त मल्ल स्पाइकर र गण्डकीका जीवन सुनार उत्कृष्ट सर्भर चुनिएका हुन् । सबैले जनही पाँच हजार प्राप्त गरेका छन् ।
