‘विवादित भएर सेनाको नेतृत्व गर्न सक्दिनँ, बरु छोड्छु भनेर गएका हुन्’

ताराध्वज पाण्डेको राजीनामाबारे प्रधानसेनापति भन्छन्-

प्रधानसेनापति प्रभुराम शर्माले प्रधानसेनापतिको लाइनमा रहेका ताराध्वज पाण्डेको बढुवाका लागि सिफारिस नभएको स्पष्ट पारेका छन् । 

संसद्को राज्य व्यवस्था तथा सुशासन समितिमा बुधबार सेनाका उच्चपदस्थ अधिकृतहरूको उमेर विवादबारे जवाफ दिँदै प्रधानसेनापतिले पाण्डेको सिफारिस भएको भनेर अनाहकमा हल्ला गरिएको बताए । 

‘ताराध्वज पाण्डेको बढुवाका लागि सिफारिस भएको थिएन,’ उनले भने, ‘प्रत्येक बढुवाअघि उजुरीका लागि सातदिने सूचना निकाल्ने गरिएको हुन्छ । त्यही सूचना निकालिएको थियो । उमेर विवादमा परेका पाण्डेलाई रक्षा मन्त्रालयमा बढुवाको सिफारिस गर्‍याे भनेर हल्ला चलाए ।’

उनले व्यक्तिगत गुण, कार्यसम्पादन, नेतृत्व क्षमता, पेसागत क्षमता, कार्यकुशलता र प्रत्येक वर्ष मेडिकल परीक्षण हेरेपछि मात्र बढुवाको सिफारिस गर्ने गरिएको बताए ।

प्रधानसेनापतिले पाण्डेका विषयमा बाहिर विवादहरू आएपछि आफूले कुरा गरेको र आफूलाई भनेरै पाण्डेले राजीनामा दिएको स्पष्ट पारे । 

‘मैले आधा घन्टा राखेर यस्तो विवादित भएपछि कसरी चिफ चलाउन सक्छौ भनेर सोधेँ,’ सांसदहरूसमक्ष उनले भने, ‘तपाईं मेरो बुबाजस्तो मान्छे, मैले सक्दिनँ, यस्तो विवादित भएर म बस्दिनँ, छोड्छु भनेर मेरैअगाडि भनेर गएको हो । त्यसमा अन्यथा भएको छैन ।’