मकवानपुरगढीमा मोटरसाइकल दुर्घटना हुँदा दुईजनाको मृत्यु

मकवानपुरको मकवानपुरगढी गाउँपालिकामा बिहीबार दिउँसो मोटरसाइकल दुर्घटना हुँदा दुईजनाको मृत्यु भएको छ।

पालिकाको बाँसपानीबाट सुकौरातर्फ जाँदै गरेको मोटरसाइकल मकवानपुरगढी– २ बाँसपानीमा सडकबाट करिब सय मिटर तल खस्दा दुईजनाको घटनास्थलमै मृत्यु भएको जिल्ला प्रहरी कार्यालय मकवानपुरले जनाएको छ।

मृतक एक महिला र एक बच्चाको पहिचान खुल्न सकेको छैन। मोटरसाइकलचालक भने घाइते भएका र उपचारका लागि हेटौँडा अस्पताल ल्याइएको प्रहरीले जनाएको छ।

दुर्घटना भएको मोटरसाइकलको नम्बर, मृतक र घाइतेको विवरण खुल्न बाँकी छ।