‘अपुतालीको धन’ प्राप्त गर्ने चक्करमा लाग्दा काठमाडौंका ६९ वर्षीय तारा पुरीले ९५ लाख रुपैयाँ गुमाएका छन् । नेपाल सरकारको पूर्वकर्मचारीसमेत रहेका पुरी टर्कीको इस्तानबुल बैंकमा रहेको भनिएको ९५ लाख अमेरिकी डलर पाउने आशामा ठगिएका हुन् ।
ठगी घटना यसरी सुरु हुन्छ– पुरीलाई टर्कीको इस्तानबुलस्थित इस्तानबुल बैंकको नामबाट एउटा इमेल आयो । इमेलमा उल्लेख थियो, ‘इस्तानबुल बैंकमा एड्रिन पुरीको नाममा ९५ लाख अमेरिकी डलर छ । उनको केही महिनाअघि गएको भूकम्पमा मृत्यु भइसकेको छ । हकवाला कोही नभएको हुँदा तपाईंले नाता प्रमाणित गरेर लिन सक्नुहुन्छ ।’ इन्जिनियर पुरीको मनमा लोभ पलायो । मृतक पुरी नै भएको हुँदा नाता प्रमाणित गर्न सकिने आत्मविश्वास उनमा जाग्यो । उनले आवश्यक प्रक्रिया बुझ्न भन्दै तुरुन्तै बैंकलाई इमेल रिप्लाई गरे । बैंकले पुरीसँग नागरिकता, पासपोर्टदेखि आवश्यक सबै कागजात माग्यो । पुरीले सबै कागजात स्क्यान गरेर इमेल गरे ।
एसएसपी सोेमेन्द्रसिंह राठौर, प्रमुख, उपत्यका अपराध अनुसन्धान कार्यालय
मृतकको नाममा रहेको रकम उपलब्ध गराउने भन्दै एक पीडितबाट ९५ लाखभन्दा धेरै रकम ठगी भएको अनुसन्धानबाट खुलेको छ । घटनामा संलग्न केही व्यक्ति पक्राउ परेका छन् । केही फरार छन् । उनीहरूले सोही तरिका अपनाएर विभिन्न व्यक्तिबाट आठ करोड ५७ लाख रुपैयाँभन्दा धेरै ठगी गरेको देखिन्छ ।
त्यसपछि आवश्यक कानुनी प्रक्रिया मिलाउन भन्दै उनलाई तुरुन्तै इस्तानबुल आउन अर्को इमेल आयो । तर, उनी तुरुन्तै इस्तानबुल जाने अवस्थामा थिएनन् । उनले आफ्नो परिस्थितिबारे इमेलमार्फत बैंकलाई जानकारी गराए । बैंकबाट पुनः अर्को इमेल आयो । इमेलमा लेखिएको थियो, ‘आउन नसक्ने भए कानुनी प्रक्रिया मिलाउन तपाईंले अधिवक्ता ‘हायर’ गर्नुपर्ने हुन्छ । यसका लागि तपाईंले शुल्क बुझाउनुपर्ने हुन्छ ।’ पुरी सहमत भए । रकम पठाउन बैंकले नेपाली बैंककै खाता नम्बर उपलब्ध गराएको थियो । पुरीले सोही खातामा रकम पठाउन थाले । बैंकले नयाँ–नयाँ कानुनी अड्चन देखाउँदै गयो । त्यसका लागि थप शुल्क लाग्ने भन्दै पुरीसँग रकम माग्दै गयो । लोभिएका पुरी रकम चुकाउँदै गए ।
९५ लाख रुपैयाँ भुक्तानी गरिसकेपछि उनलाई काठमाडौं उपत्यका अपराध अनुसन्धान कार्यालयबाट टेलिफोन आयो । तुरुन्तै कार्यालय आउन भनियो । उनी दौडिएर अपराध अनुसन्धान कार्यालय पुगे । जसको नाममा रहेको बैंक खातामा उनले रकम पठाउँदै आएका थिए, सोही व्यक्ति अनलाइन ठगीमा पक्राउ परेका रहेछन् । यो सुनेर पुरी छाँगाबाट खसेझैँ भए । आफू ठगिएको भेउ बल्ल थाहा पाए ।
काठमाडौं उपत्यका अपराध अनुसन्धान कार्यालयले घटनामा संलग्न महावीर शाह, कमल चौधरी, पुरुषोत्तम कार्की र लक्ष्मण नेपालीलाई पक्राउ गरेको छ । कार्यालयका अनुसार उनीहरूले सोही तरिका अपनाएर विभिन्न व्यक्तिबाट आठ करोड ५७ लाख रुपैयाँभन्दा धेरै रकम ठगेको खुलेको छ । घटनाका ‘मास्टर माइन्ड’ पाकिस्तानी नागरिक आदिल हुन् । उनीसहित अन्य छजना फरार रहेको प्रहरीले जनाएको छ ।
उपत्यका अपराध अनुसन्धान कार्यालयका प्रमुख एसएसपी सोेमेन्द्रसिंह राठौरले भने, ‘मृतकको नाममा रहेको रकम उपलब्ध गराउने भन्दै एक पीडितबाट ९५ लाखभन्दा धेरै रकम ठगी भएको अनुसन्धानबाट खुलेको छ । घटनामा संलग्न केही व्यक्ति पक्राउ परेका छन् । केही फरार छन् । उनीहरूले सोही तरिका अपनाएर विभिन्न व्यक्तिबाट आठ करोड ५७ लाख रुपैयाँभन्दा धेरै ठगी गरेको देखिन्छ ।’
