पोखरा रंगशालास्थित ओभरहेड खानेपानी ट्यांकी निर्माणकार्य पूरा हुन समय लाग्ने भएको छ । गत वैशाखमा निर्माणकार्य सकिनुपर्ने थियो । काठमाडौं धुम्बाराहीको सागर निर्माणले ३० वैशाख ०८० मा निर्माण सकाउने गरी ठेक्का पाएको थियो । कम्पनीले सम्झौता गरेअनुसार काम नगर्दा निर्माणको काम ४० प्रतिशत मात्र भएको छ । पोखरा रंगशालामा रहेका विभिन्न भवनमा पानी आपूर्ति गर्ने गरी राष्ट्रिय खेलकुद परिषद् (राखेप)ले गत आर्थिक वर्ष ०७९/८० को बजेटमा एक करोड रकम विनियोजन गरेको थियो ।
यसै रकमभित्र रहेर ट्यांकी निर्माणमा लागि निकालेको बोलपत्रमा सागर निर्माण सेवा छनोट भएको थियो । कम्पनीले भ्याटसहित ८६ लाख ९९ हजार ६७ रुपैयाँमा निर्माण गर्ने गरी ३० साउन ०७९ मा राखेपसँग सम्झौता गरेको थियो । निर्माण अवधिको समय नाघेको तीन महिनापछि पनि कम्पनीले खासै काम अगाडि बढाएको छैन । गत असारको तेस्रो सातादेखि काम नै भएको छैन । काम रोकिँदा ट्यांकी निर्माण अलपत्र अवस्थामा छ ।
तीन तलामाथि गोलाकार रूपमा बन्ने पानीट्यांकीमा एक लाख लिटर पानी अट्ने राखेपअन्तर्गत पोखरामा कार्यरत इन्जिनियर अनिल अधिकारीले जानकारी दिए । अहिले दुई तलाबराबरको पिलर ठड्याउने र बिम बाँध्ने काम भएको छ । अर्को एक तालको पिलर ठड्याउने र बिम बाँध्ने कामसँगै गोलाकार रूपमा बन्ने टयांकी निर्माणको काम बाँकी रहेको छ ।
कम्पनीका अधिकारीले कामदार नभएर काम रोकेको बताएका छन् । कम्पनीले वैशाखमै म्याद थपका लागि निवेदन दिएको थियो । ओभरहेड खानेपानी ट्यांकी नहुँदा रंगशाला परिसरमा रहेका भवनमा पानीको समस्या छ । रंगशाला परिसरमा आफ्नै बोरिङ भए पनि ओभरहेड ट्यांकी नहुँदा लामो समययदेखि पानीको समस्या हुँदै आएको छ ।
‘तीन महिनाभित्र सकाउने लक्ष्य छ’
सुरज बिडारी, लेखापाल, निर्माण सेवा
हामीले ३० वैशाख ०८० मा काम सम्पन्न गर्ने भनी ठेक्का लिएका थियौँ । तर, विविध कारणले समयमा काम पूरा गर्न नसकिएको स्वीकार गर्छु । गत वर्षको दसैँ–तिहारको बीचबाट काम भएको थियो । काम असार महिनाको बीचदेखि रोकिएको हो । समयमा निर्माणकार्य नसक्ने भए पनि म्याद थपका लागि वैशाखमै निवेदन दिएका थियौँ । काम गर्ने मजदुर सबै भारतीय छन् । उनीहरू रोपाइँलगायत अन्य कामले घर गएका छन् । एक सातामा आउँछन् होला । उनीहरू आएपछि काम सुरु हुन्छ । अब बढीमा तीन महिनामा सबै काम सम्पन्न गर्ने लक्ष्य राखेका छौँ ।
