मच्छिन्द्र फुटबल क्लबले एएफसी कप छनोटअन्तर्गत प्लेअफको दोस्रो चरणमा भारतको मोहन बगानसँग प्रतिस्पर्धा गर्ने भएको छ । मच्छिन्द्रले मंगलबार दशरथ रंगशालामा प्रारम्भिक छनोट चरणमा भुटानको लिग च्याम्पियन पारो एफसीलाई ३–२ ले हराउँदै दोस्रो चरणको स्थान बनाएको हो । मच्छिन्द्रले पहिलोपटक एएफसी कपको प्रारम्भिक चरण पार गरेको हो । अघिल्लोपटक पहिलो चरणबाटै बाहिरिएको मच्छिन्द्रले अब ३१ साउनमा कोलकाताको साल्टलेक रंगशालामा मोहन बगानको सामना गर्नेछ । मोहन बगान भारतको इन्डियन सुपर लिग खेल्ने क्लब हो ।
मच्छिन्द्र र मोहन बगानबीचको विजेताले समूह चरणमा स्थान बनाउनेछ । यस टोलीले बंगलादेशको अवाहानी ढाका र माल्दिभ्सको क्लब इगल्सको विजेतासँग भिड्नेछ । गत वर्ष श्रीलंकाको ब्लु स्टारसँग मच्छिन्द्र प्रारम्भिक चरणमै पराजित भएको थियो । पारोविरुद्धको खेलमा मच्छिन्द्रका लागि विमल घर्तीमगर, आयुष घलान र अोलावाले आफिजले समान एक गोल गरेका थिए । अनुभवी खेलाडीको साथ पाएको पारोले रंगशालामा खेलको छैटौँ मिनेटमै १–० को अग्रता लिएको थियो । काजुओकोले अप्रत्याशित रूपमा मच्छिन्द्रविरुद्ध अग्रता गोल गरेका हुन् । डिबक्सभित्रको बायाँ साइडमा यशी दोर्जीको सटिक पासमा काजुअोले सहजै गोल गरे ।
मच्छिन्द्रका गोलरक्षक विशाल श्रेष्ठले उनको प्रहारलाई बचाउन प्रयास नगरेका होइनन्, तर बल श्रेष्ठको ग्लोबमा लाग्दै गोलमा परिणत भयो । चार हजार एक सय ५० घरेलु दर्शकमाझ मच्छिन्द्रले खेलको १२औँ मिनेटमै बराबरी गोल फर्काउन सफल भयो । विमलले घरेलु टोलीलाई बराबरीमा ल्याएका हुन् । उनले आयुषको क्रसमा हेडिङ गोल गरे । खेलमा फर्किएको मच्छिन्द्रले पारोमाथि बिस्तारै दबाब राख्न सफल भयो । खेलको १५अौँ मिनेटमा आयुषले मच्छिन्द्रलाई २–१ को अग्रता दिलाए ।
मध्यान्तरअघि तीन गोल
मच्छिन्द्रको दोस्रो गोलमा उत्कृष्ट तालमेल बनेको थियो । स्ट्राइकरद्वय विमल र आयुषबीचको उत्कृष्ट तालमेलका कारण मच्छिन्द्रको गोल सम्भव भएको हो । विमलले डिबक्सभित्र उपलब्ध गराएको पासमा आयुषले पहिलो टचमै गोल ठोके । त्यसपछि खेलको ३९अौँ मिनेटमा मच्छिन्द्रले ३–१ को अग्रता लियो । यसपटक आफिजले काउन्टर एट्याकमा गोल गरे । मिडफिल्डमा अोमोलाजाले आफिजलाई पास दिए । ओमोलाजाको क्रसमा आफिजले हेडिङ गोल गर्दै मच्छिन्द्रलाई तेस्रो गोलको अग्रता दिलाए । सुरुवातमा उत्कृष्ट प्रदर्शन गरेको पारोले मच्छिन्द्रले बराबरी गोल फर्काएलगत्तै पकड गुमाएको थियो ।
मच्छिन्द्रले भने बिस्तारै बल पोसेसन बनाउँदै विपक्षीमाथि दबाब कायम गरेको थियो । मध्यान्तरपछि पारोले खेलमा सुधार गरेको थियो । पारोले मच्छिन्द्रका खेलाडीले गल्ती गर्दा गोल प्रयास गरेको देखिन्थ्यो । खेलको ५८अौँ मिनेटमा दोर्जीको गोल प्रयासलाई मच्छिन्द्रका गोलरक्षक विशालले बचाए । निरन्तर खेलमा फर्कने प्रयास गरिरहेको पारोले खेलको ७१अौँ मिनेटमा ३–२ को गोलअन्तर बनायो । एभान्सले यसपटक पारोका लागि गोल गरे । पारोका करिमको एक सटिक फ्रिकिक गोलपोस्टभन्दा माथि गएको थियो ।
‘ए’ लाइसेन्स अनिवार्य
खेलको अन्तिम समयमा गोलरक्षक तथा कप्तानसमेत रहेका विशालले एभान्सले ६ यार्ड बक्सबाट प्रहार गरेको बल क्लियर गर्दैै मच्छिन्द्रलाई दोस्रो चरणको स्थान पक्का गराए । यद्यपि, खेलको अन्तिम इन्जुरी समयमा विमलले मच्छिन्द्रको अग्रतालाई ४–२ पुर्याउन चुके । उनले लगभग खाली पोस्टमै गोल गर्न सकेनन् । गत सिजनको सहिद स्मारक ‘ए’ डिभिजन लिगको विजेता चर्च ब्वाइजसँग एएफसी ‘ए’ लाइसेन्स नभएका कारण मच्छिन्द्र भाग्यमानी हुँदै एएफसी कपको प्रारम्भिक चरण खेल्न अवसर पाएको हो । लिगमा मच्छिन्द्र उपविजेता हो । एएफसी कपको प्रारम्भिक चरणमा खेल्न ‘ए’ लाइसेन्स अनिवार्य हुनुपर्छ । नेपालका विभागीय तीनवटै क्लबसँग ‘ए’ लाइसेन्स छ ।
दबाबपूर्ण खेल थियो
किशोर केसी, प्रशिक्षक, मच्छिन्द्र
यो खेल निकै दबाबपूर्ण थियो । हामीले पहिलो हाफमा निकै राम्रो खेल्यौँ । यद्यपि, सुरुवातीमै गोल बेहोर्दा अलि कमजोरजस्तो देखियो । त्यसपछि तीन गोल हुँदा खेलमा पकड बनायौँ । तर, जुन लक्ष्यका साथ मैदानमा ओर्लियौँ, त्यो पूरा नभएकोजस्तो लाग्छ । धेरै गोलअन्तरमा जित निकाल्ने योजना थियो । पारोसँग प्रेसर खेल हुँदा नै खेलाडीले फोकस गर्न सकेनन् । खेलाडीले जितका लागि सबै प्रयास गरे । जसरी पनि जित नै निकाल्ने योजना थियो । अहिले भएका गल्तीलाई अर्को चरणमा सच्याउने प्रयास हुनेछ । दोस्रो चरणमा मोहन बगानसँग खेल छ । उनीहरूको खेलबारे राम्रो जानकारी लिँदै योजना बनाउनेछु । अहिलेदेखि नै कस्तो हुन्छ भन्न सकिन्न । अर्को खेलमा सुरुमै अग्रता लिनुपर्छ ।
पहिलो हाफमा फोकस भएन
पुष्पलाल शर्मा, प्रशिक्षक, पारो
सुरुवातमै अग्रता लिँदा खेलमा पकड बनाएकोजस्तो लागेको थियो । तर, मच्छिन्द्रले मध्यान्तरअगाडि नै तीन गोल गर्न सफल भयो । यहीँ नै हाम्रो फोकस गुमेकोजस्तो लाग्छ । एक प्रशिक्षकका रूपमा ‘परफेक्ट’ टिम बनाउने हो । मैले यस टिमलाई एक उत्कृष्ट टिम बनाउने कोसिस गरेको थिएँ । प्रतिस्पर्धामा मैदानले पनि धेरै असर गरेको देखियो । नेचुरल मैदानमा खेल्न खेलाडीलाई समस्या भयो । भुटानमा हामीले फरक किसिमको मैदानमा अभ्यास गरेका थियौँ । वर्षाका कारण मैदान ओसिलो थियो । खेलाडीले बल पोसेसन बनाउन सकेनन् ।
मोहन बगान कस्तो प्रतिद्वन्द्वी ?
भारतको फुटबल इतिहासमा मोहन बगान पुरानो क्लबका रूपमा चिनिन्छ । सन् १८८९ मै कोलकातामा यस क्लबको स्थापना भएको थियो । एसियाको सबैभन्दा पुरानो क्लबमा यो पर्छ । यस क्लबले रेकर्डका रूपमा राष्ट्रिय फुटबल लिगको उपाधि जितेको छ । यसैगरी, दुईपटक आइलिग उपाधि हात पारेको छ । यसैगरी, इन्डियन सुपर लिगमा मोहन बगानले एकपटक ट्रफी उचालेको छ । मोहन बगानमा धेरैजसो खेलाडी स्थानीय नै छन् । पछिल्लो समयमा तीन अस्ट्रेलियन खेलाडीले यस क्लबबाट खेलिरहेका छन् । यसैगरी, अल्वानिया र फ्रान्सका खेलाडी पनि यस क्लबमा छन् ।
मनाङ मात्रै समूह चरणमा
नेपालबाट मनाङ मस्र्याङ्दी क्लबले मात्रै सीधै समूह चरणमा प्रतिस्पर्धा गरेको इतिहास बनाएको छ । यसबाहेक अन्य क्लबको एएफसी कप रेकर्ड राम्रो छैन । पछिल्ला सिजन मच्छिन्द्र दशरथ रंगशालामा श्रीलंकाको ब्लु स्टारसँग प्रारम्भिक चरणमै पराजित हुँदै बाहिरिएको थियो । एएफसी कपको प्रारम्भिक छनोट खेलेको त्रिभुवन आर्मी क्लब दोस्रो चरणमा पुगेको थियो ।
