काठमाडौं महानगरले आगामी तीन वर्षभित्र सक्ने गरी ३५ ठूला योजनाका लागि चालू आर्थिक वर्ष ०८०/८१ मा पाँच अर्ब ८० करोड रकम छुट्याएको छ । तीमध्ये महानगरले १० वटालाई गौरवका र २५ वटालाई स्वर्णिम योजनाका रूपमा अघि बढाउने निर्णय गरेको छ ।
आमनागरिकसँग प्रत्यक्ष जोडिएका स्वास्थ्य, शिक्षा, रोजगारी प्रवर्द्धन, वातावरण सुधार र पूर्वाधार निर्माणलगायत गौरवका योजनाअन्तर्गत छन् भने आमनागरिकको प्रत्यक्ष चासोमा रहेका एवं निरन्तर सञ्चालन हुने कार्यमा स्वर्णिम योजनाहरू रहेको महानगरले जनाएको छ ।
गौरवका योजनाका लागि तीन अर्ब ८० करोड र स्वर्णिम योजनाका लागि दुई अर्ब बजेट विनियोजन गरिएको छ । महानगरका प्रशासकीय अधिकृत वसन्त अधिकारीका अनुसार कतिपय योजना मर्मत गरे मात्र पुग्ने खालका छन् । कतिपय योजनालाई निरन्तर चलाउनुपर्छ । यी योजनाहरू १३औँ नगरसभाको अधिवेशनमा विनियोजन विधेयकमा पेस भएका हुन् ।
२५ स्वर्णिम योजना
- सुन्दर विद्यालय परियोजना : विद्यालयलाई कलात्मक, सुन्दर र हरियाली प्रवर्द्धन गर्ने गरी पाँच करोड विनियोजन ।
- स्वच्छ भान्सा कार्यक्रम : खानेकुराबाटै निदानात्मक, प्रवर्द्धनात्मक र उपचारात्मक सेवाका लागि तीन करोड ५० लाख विनियोजन ।
- खेलकुद पूर्वाधार परियोजना : खुला चौर, गौचरनलगायत स्थानको पूर्वाधार सुधार गर्न आठ करोड विनियोजन ।
- एग्रो पुलिङ परियोजना : महानगरवासीलाई स्वस्थ, स्वच्छ तथा गुणस्तरीय खाद्यान्न, तरकारी र फलफूल उपयोग गर्न सघाउने गरी कार्यक्रम गर्न एक करोड विनियोजन ।
- पूर्वाधार एम्बुलेन्स : पूर्वाधारमा देखिएका समस्या तत्काल मर्मत–सम्भार गर्न २५ करोड विनियोजन ।
- एकल सेवा केन्द्र : प्रशासन विभागबाट कार्यान्वयन हुने एकल सेवा केन्द्रका लागि चार करोड विनियोजन ।
- श्रम बैंक : रोजगारी प्रदान कार्यक्रम सञ्चालनका लागि दुई करोड ५० लाख विनियोजन ।
- न्याय चौतारी : सहजकर्तामार्फत न्यायमा पहुँच वृद्धि गर्ने कार्यक्रम सञ्चालनका लागि एक करोड विनियोजन ।
- पिउने पानी तथा सार्वजनिक शौचालय : चार करोड विनियोजित योजनाअन्तर्गत सार्वजनिक स्थानमा शौचालय र पिउने पानी ।
- इरेन्टल : घरबहाल व्यवस्थापनका लागि इन्टरनेटमा आधारित प्रणाली बनाउने दुई करोड विनियोजन गरिएको छ ।
- सुलभ फार्मेसी : सुपथ र सहज ढंगबाट औषधि बिक्री–वितरण गर्ने गरी सुलभ फार्मेसी सञ्चालन गर्न ६ करोड विनियोजन गरिएको छ ।
- यातायात तथा ट्राफिक : यातायात प्रणालीलाई प्रभावकारी रूपमा व्यवस्थापन गरेर सडक सुरक्षाको प्रत्याभूति गराउन २० करोड विनियोजन ।
- नदी सफाइ : सात करोड विनियोजन गरिएको यो कार्यक्रमअन्तर्गत महानगरपालिका भएर बग्ने नदी र खोलालाई नियमित र प्रभावकारी रूपमा सरसफाइ गर्ने योजना छ ।
- डुबान समाधान : चार करोड विनियोजन योजनाअन्तर्गत ढल प्रणालीको नियमित र प्रभावकारी सरसफाइ गरेर सतह पानीको प्रवाहलाई नियमित गरेर डुबान समस्या समाधान गरिनेछ ।
- ढुंगेधारा, हिटी र पोखरी संरक्षण : ढुंगेधारा, हिटी र पोखरीहरूको नियमित सरसफाइ गरेर जीवन्त बनाउन तीन करोड विनियोजन ।
- आरोग्य जीवन : नागरिकको शारीरिक र मानसिक स्वास्थ्यलाई स्वस्थ र तन्दुरुस्त बनाउन योग र ध्यानजस्ता क्रियाकलाप, आयुर्वेदिक उपचार पद्धतिलाई प्रवर्द्धन गर्न तीन करोड विनियोजन ।
- मेट्रो मार्ट : दैनिक उपभोग्य वस्तुबारे अनलाइन प्रणालीमार्फत जानकारी दिने, उपभोक्ताका घरमा खाद्यान्न तथा तरकारी पठाउने प्रणालीका लागि सहजीकरण गर्ने गरी कार्यक्रम गर्न एक करोड विनियोजन ।
- साथी महानगर : सेवाग्राही र महानगरवासीबीच आत्मीय सम्बन्ध स्थापना गर्ने कार्यक्रमका लागि दुई करोड विनियोजन ।
- स्मार्ट टोल : टोल विकास समितिहरूको पुनस्र्थापना गरेर उनीहरूमार्फत तोकिएबमोजिमका स्मार्ट टोल निर्माण गर्ने क्रियाकलाप सञ्चालन गर्न ३५ करोड विनियोजन ।
- सांस्कृतिक सहर : तीन करोड विनियोजन गरिएको यो योजनाअन्तर्गत महानगरभित्रका मूर्त–अमूर्त सांस्कृतिक सम्पदालाई उजागर गर्ने, पुनर्ताजगी गरिनेछ ।
- पर्यटकीय सहर : पर्यटकका लागि आवश्यक र उपयोगी सूचना दिन सक्ने एप्लिकेसन निर्माण गर्ने, होम स्टेमार्फत मौलिक कला, संस्कृतिको प्रवर्द्धन गने दुई करोड ।
- सम्पदा मर्मत तथा संरक्षण कार्य : सबै सम्पदा क्षेत्रको नियमित मर्मत–सम्भार र सुन्दरताका लागि २३ करोड विनियोजन ।
- अनुसन्धान तथा अन्वेषण केन्द्र : महानगरको आर्थिक, सामाजिक तथा भौतिक समृद्धि र पहिचानका लागि सम्भावनाका क्षेत्रहरूको अध्ययन–अनुसन्धान गर्ने योजनाअन्तर्गत पाँच करोड विनियोजन ।
- सबैको योजना, सबैको विकास : विकास अभियानमा आबद्ध हुन चाहने सामाजिक संघ–संस्थाहरूको सहलगानीमा गतिविधि सञ्चालन गर्ने गरी पाँच करोड विनियोजन ।
- सुन्दर महानगर : यस योजनाका लागि २५ करोड रुपैयाँ विनियोजन गरिएको छ । सडक, सडकपेटी, पर्खाल, कार्यालय, पार्कलगायत सार्वजनिक ठाउँहरूको सुन्दरता बढाउने क्रियाकलाप सञ्चालन गरिनेछन् ।
