गुल्मीको छत्रकोट गाउँपालिका– ४ का ३७ वर्षीय चिरञ्जीवी पन्थ गाउँमा विद्युतको काम गर्थे । गाउँमै सानोतिनो व्यवसाय थियो । बिस्तारै परिवारका आवश्यकता बढ्दै गएपछि उनले गाउँ छोडे ।
त्यसवेला सहरको रोजगारी र छोराछोरीलाई राम्रो ठाउँमा पढाउने हुटहुटी थियो । ०७५ सालमा बुटवल झरेका पन्थले पार्टनरमा होटेल गर्न थाले । तर, दुर्भाग्य ०७७ बाट कोभिड सुरु भयो । होटेलको कमाइ खस्किँदै गएपछि लगानी डुब्ने जोखिम बढ्यो । उनी फेरि ०७७ मा बुटवलबाट आफ्नै घर फर्किए ।
उनले गाउँ आएपछि एक वर्ष कृषि खोजमा बिताए । ०७८ सालमा आठ सय अकबरे खुर्सानी लगाए । अकबरे खुर्सानीबाट ५२ हजार रुपैयाँ कमाएपछि पन्थ उत्साहित भए । ०७९ मा पुनः २२ हजार अकबरे खुर्सानी लगाएपछि उनले साढे सात लाख आम्दानी गरे ।
उनले खुर्सानीबाट मात्रै साढे चार लाख नाफा कमाए । अहिले उनले खुर्सानीसहित बेमौसमी ८५ सय बन्दागोभी रोपेका छन् । बेमौसमी तरकारीको मूल्य राम्रो भए पनि उत्पादन सफलतामा चुनौती छ ।
उनी लामो समयको खडेरी र पछिल्लो समय निरन्तर परेको पानीले गोभीमा केही समस्या भए पनि राम्रो आम्दानीको आशामा छन् । उनले कृषि ज्ञान केन्द्रमार्फत आर्थिक तथा प्राविधिक सहयोग पाएका छन् ।
पन्थले कृषि ज्ञान केन्द्रका हरेक कर्मचारीको किसानमैत्री मानसिकताको प्रशंसा गरे । उनले बजारको समस्या समाधानमा राज्यले काम गरे आफूहरूले भनेको समयमा लगानीअनुसारको उत्पादन गर्न सकिने बताए ।
पन्थले गाईभैँसीबाट दैनिक २५ लिटर दूध गौरव डेरी रिडी पठाउँदै आएका छन् । उनले छिमेकी ज्ञानेश्वर ज्ञवालीको करिब ६० रोपनी जग्गा वार्षिक २० हजारका दरले लिजमा लिएका छन् । आगामी वर्ष सरकारीस्तरबाट सहयोग भए दुई हजार कागती रोप्ने उनको योजना छ । त्यसबाहेक थोपा सिँचाइमार्फत बाँकी जग्गाको उपयोगका विषयमा पनि स्थानीय तह र कृषि ज्ञान केन्द्रसँग समन्वय भइरहेको पन्थले बताए ।
पन्थले कृषिसँगै व्यावसायिक ब्राेइलर कुखुरा पनि पालेका छन् । कुटानी–पिसानी र किराना व्यवसायसमेत गरेका छन् । पन्थ गाउँ फर्किएर कृषिमा त रमाएका छन् नै । छोराछोरीको पढाइले समेत उत्साहित छन् । उनका १० वर्षीय छोरा रिगन पन्थ अर्जुन आवासीय माध्यमिक विद्यालयको कक्षा पाँचमा अध्ययनरत छन् ।
६ वर्षीया छोरी रियान्सी पन्थ सरस्वती बोहा आधारभूत विद्यालयमा पढ्छिन् । छोराछोरी नै विद्यालयका उत्कृष्ट विद्यार्थी हुन् । श्रीमती रिता कँडेल पन्थले पनि पतिकै कृषि कर्ममा सहजीकरण गरेकी छिन् ।
पन्थको परिवारबाहेक दैनिक दुईजनाले काम गर्छन् । सिजनअनुसार धेरैजनालाई आंशिक रोजगारी दिँदै आएको पन्थले बताए । लुम्बिनी कृषि तथा पशुपक्षी फर्ममार्फत पन्थलाई कृषि ज्ञान केन्द्र गुल्मीको एक लाख रुपैयाँको सहयोगमा मल्चिङ प्रविधिमा आधारित बेमौसमी गोभी उत्पादनको काम दिएको कृषि ज्ञान केन्द्रका प्रमुख नवराज भण्डारीले जानकारी दिए।
