संसद् घेराउ गर्न मिटरब्याजपीडित बानेश्वरमा

मिटरब्याजसम्बन्धी विधेयक निष्क्रिय भएपछि पीडितहरू पुनः धर्ना दिन काठमाडौं आएका छन्। मिटरब्याजविरुद्धको कानुन पारित गर्न माग गर्दै पीडितहरू संघीय संसद् भवन घेराउ गर्न बानेश्वर पुगेका छन्।

मधेस प्रदेशका विभिन्न जिल्लाबाट १८ वटा बसमा चढेर करिब एक हजार पाँच सय पीडित शनिबार काठमाडौं आएका थिए। देशका अन्य जिल्लाहरूबाट समेत माइतीघरमा जम्मा भई मार्चसहित नयाँ बानेश्वर पुगेर पीडितहरूले प्रदर्शन गरिरहेका छन्।

मिटरब्याजमा ऋण लगाएर सर्वसाधारणको उठीवास लगाउने साहुकारविरुद्ध देशभरबाट २१ हजार नौ सय ७५ उजुरी परेका छन्। तर, मिटरब्याजसम्बन्धी विधेयक निष्क्रिय भएपछि सरकार सहमतिबाट पछि हटेको भन्दै पीडितहरू पुनः राजधानी आएका हुन्।