काठमाडौं महानगरपालिकाले ललितानिवास क्षेत्रमा रहेको करिब एक सय ४३ रोपनी जग्गामा तारबार लगाउने भएको छ । बालुवाटारस्थित एनआरएनको भवनदेखि पश्चिम–उत्तरतर्फ रहेका हजारौँ कित्ताको जग्गा संरक्षण गर्न भन्दै महानगरले तारबारको तयारी गरेको हो ।
आइतबार महानगरपालिकाअन्तर्गतको नगर प्रहरी प्रमुख राजुनाथ पाण्डेको नेतृत्वमा महानगरको नगर प्रहरी त्यस क्षेत्रमा पुगेको थियो । काँडेतार लगाउने तयारीसहित गएको नगर प्रहरीले कतिपय ठाउँमा व्यक्तिले घरटहरा बनाएर बसेकाले त्यसलाई हटाउन निर्देशन दिएको छ ।
पाण्डेका अनुसार खाली सरकारी जग्गामा नयाँ संरचना निर्माण नहोस् भनेर काँडेतार लगाउने तयारी गरिएको हो । ‘सरकारी जग्गामा बनेका पुराना अस्थायी संरचना हटाउन निर्देशन दिएका छौँ । त्यहाँ करिब १० वटा टहरा बनेका रहेछन् । जग्गा हजारौँ कित्तामा टुक्रिएका रहेछ,’ उनले भने, ‘कतिपय कित्ता रोक्का अवस्थामा छन् । यसमा सरकारी र व्यक्तिगत कति छन् भनेर छुट्याउँदै छौँ । त्यसलगत्तै तारबार लगाएर सरकारी जग्गा संरक्षण गर्छौँ ।’
उनले सरकारी र व्यक्तिगत जग्गा यकिन गर्न नापी तथा मालपोत कार्यालयसँग नक्सा विवरण पनि माग गरिएको बताए । सार्वजनिक जग्गा पहिचान गरी एक–दुई दिनभित्र तारबार लगाउने तयारी गरिएको नगर प्रहरी प्रमुख पाण्डेले बताए । महानगरले ललितानिवास क्षेत्रमा बनेका अवैध र अस्थायी संरचना हटाउन निर्देशन दिएको छ ।
महानगरले २४ घन्टे मौखिक अल्टिमेटम दिएको महानगरका प्रवक्ता नवीन मानन्धरले जानकारी दिए । ‘ललितानिवास क्षेत्रको केही जग्गामा अस्थायी संरचना खडा गरेर बस्ने पनि रहेछन् । हामीले कानुनी क्षेत्राधिकारअनुसार उक्त जग्गा संरक्षण गर्न जुटेका छौँ,’ प्रवक्ता मानन्धरले भने ।
