सिन्धुलीकाे मरिण गाउँपालिकाको खयरसाल माध्यमिक विद्यालयमा रहेको परीक्षा केन्द्रमा कक्षा १२ को सामाजिक विषयको परीक्षाको क्रममा एउटा उत्तरपुस्तिका बढी भेटिएको छ ।
सो उत्तरपुस्तिका परीक्षा चलिरहेका वेला बाहिर कतै बसेर लेखिएको हुन सक्ने बताइएको छ ।
शिक्षा समन्वय एकाइका प्रमुख निर्मल घिमिरेले अनुगमनको क्रममा एउटा उत्तरपुस्तिका बढी पाइएको भन्दै सो उत्तरपुस्तिकामा परीक्षा दिने परीक्षार्थीको परीक्षा रद्द गरिएको जानकारी दिए । उनले ती परीक्षार्थी को हुन् भन्नेबारे खुलाएनन् । तर, शनिबार आवश्यक कारबाहीको निर्णय हुने जानकारी दिए ।
शुक्रबार कक्षा १२ को सामाजिक विषयको परीक्षामा एउटै नम्बरका दुईवटा उत्तरपुस्तिका फेला परेका थिए । परीक्षा सकिएपछि गणना गर्ने क्रममा जिल्ला सदरमुकामबाट पुगेको अनुगमन टोलीले एउटा उत्तरपुस्तिका बढी रहेको भेटेको थियो ।
खयरशाल परीक्षा केन्द्रमा अनियमित तरिकाले परीक्षा सञ्चालन भइरहेको उजुरी परेपछि प्रमुख जिल्ला अधिकारी सुनिता नेपाल, प्रहरी उपरीक्षक सिलवाल र शिक्षा समन्वय कार्यालय सिन्धुलीका प्रमुख निर्मल घिमिरेको टोली अनुगमनमा गएको थियो ।
अनुगमन टोली पुगेकै वेला एक शिक्षकले सो उत्तरपुस्तिका ल्याएर मिसाउन खोजेका थिए । त्यसपछि खोजबिन गर्दा गोजीमा हालेर ल्याइएजस्तो खुम्चिएको अवस्थामा रहेको उत्तरपुस्तिका जफत गरिएको थियो । सोही नम्बरको अर्को उत्तरपुस्तिका पनि भेटिएको छ ।
घटनाबारे उच्च शिक्षा माध्यमिक परिषद्लाई जानकारी गराइसकिएको भन्दै घिमिरेले शनिबार परिषद्को जनकपुर कार्यालयबाट प्रतिनिधि आएपछि आवश्यक निर्णय लिइने बताए ।
