रेफ्रीमाथि प्रश्न

आइतबार, ३ बैशाख, २०८०
डिजिटल संस्करण

रेफ्रीकै कारण नतिजा तल–माथि भएको भन्दै सहिद स्मारक ‘ए’ डिभिजन लिगका अधिकांश क्लबले असन्तुष्टि जनाउँदै आएका छन् 

सहिद स्मारक ‘ए’ डिभिजन लिग ०७९–८० मा रेफ्रीको निर्णयमाथि प्रश्न उठ्न थालेको छ । बारम्बार रेफ्रीको गलत निर्णयले क्लब डुब्ने स्थिति आएको अधिकांश क्लबले आरोप लगाएका छन् । शनिबार जारी लिगको ५८औँ खेलमा मच्छिन्द्र फुटबल क्लब र न्युरोड टिम एनआरटीले प्रतिस्पर्धा गरेका थिए । दशरथ रंगशालामा साबिक दुईपटकको च्याम्पियन मच्छिन्द्र एनआरटीसँग १–१ को बराबरीमा रोकियो । खेलपछि भएको पत्रकार सम्मेलनमा दुवै टोलीका प्रशिक्षकले रेफ्रीमाथि असन्तुष्टि जनाए । ‘रेफ्री सधैँ निष्पक्ष हुनुपर्छ । तर, आज त्यस्तो देखिएन,’ साबिक दुईपटकको च्याम्पियन मच्छिन्द्रका प्रशिक्षक किशोरकुमार केसीले दुखेसो पोखे । 

उनले घटनाको विषयमा टोली व्यवस्थापकले अखिल नेपाल फुटबल संघ (एन्फा)लाई अपिल गर्ने बताए । केसी मच्छिन्द्रको प्रशिक्षण सम्हाल्न आएयता पहिलो बराबरी नतिजा निकालेको हो । अघिल्ला दुई खेलमा मच्छिन्द्रले खुमलटारलाई ७–३ र संकटालाई २–० ले पराजित गरेको थियो । केसीले सुन्दर फुटबल खेल्न आएको, तर सफल नभएको प्रतिक्रिया दिँदै एनआरटीले राम्रो प्रदर्शन गरेको भन्दै तारिफ गरे । 

आफिजलाई रातो कार्ड
दशरथ रंगशाला, च्यासल मैदान र एन्फा कम्प्लेक्समा भइरहेको लिगमा सात रेफ्री र १७ असिस्टेन्ट रेफ्री छन् । जसमा चार फिफा रेफ्री र ६ असिस्टेन्ट रेफ्रीले निर्णायक भूमिका पाएका छन् । मच्छिन्द्र र एनआरटीबीचको खेल रेफ्री श्याम दनुवारले खेलाएका थिए । असिस्टेन्ट रेफ्रीमा सहदेव श्रेष्ठ र मधुकर आचार्य तथा फोर्थ रेफ्रीमा ज्ञानबहादुर मोक्तान थिए । रेफ्री एसेसर श्रीराम रञ्जितकार हुन् । खेलको ८७औँ मिनेटमा पेनाल्टी नपाएपछि एनआरटीका अफिसियलले फोर्थ रेफ्रीलाई अपिल गरेका थिए । मच्छिन्द्रका विदेशी रक्षक आमोलाजा नुरैन करिमले पेनाल्टी बक्समा हातले बल रोकेका थिए । एनआरटीका पदाधिकारी र खेलाडीले पेनाल्टीको अपिल गरे पनि रेफ्री दनुवारले कुनै प्रतिक्रिया जनाएनन् । 

खेलपछि रेफ्रीसँग विवाद गर्दै मच्छिन्द्रका खेलाडीहरू । तस्बिर : ज्ञानेन्द्र कार्की/नयाँ पत्रिका

खेलपछि मच्छिन्द्रको पूरा टोली नै रेफ्रीमाथि जाइलागेको थियो । विवादमा उत्रिएपछि रेफ्री दनुवारले मच्छिन्द्रका विदेशी स्ट्राइकर आफिज ओलावाले ओलादिपोलाई दोहोरो पहेँलो कार्ड देखाए । यसपछि मच्छिन्द्रका खेलाडी र अफिसियल रेफ्रीसँग वादविवादमा उत्रिए । रातो कार्डपछि आफिजले दशौँ चरणमा विभागीय टोली सशस्त्र प्रहरी बल एपिएफसँगको खेल गुमाउनेछन् । जारी लिगमा ६ खेल खेलेका आफिजले एक ह्याट्रिकसहित आठ गोल गरिसकेका छन् । 

जावलाखेल शीर्ष स्थानमा 
कीर्तिमानी आठौँपटकको लिग च्याम्पियन मनाङ मर्स्याङ्दी क्लबलाई हराउँदै जावलाखेल युथ क्लब तालिकाको शीर्ष स्थानमा उक्लिएको छ । च्यासल मैदानमा जावलाखेलले मनाङलाई ३–० ले हरायो । जितसँगै जावलाखेलले नौ खेलमा पाँच जित, दुई बराबरी र दुई हारको नतिजासहित १७ अंक जोडेको छ । चार जित, तीन बराबरी र दुई हारको नतिजासहित १५ अंक जोडेर मनाङ तेस्रो स्थानमा झर्‍यो । जावलाखेललाई जित दिलाउन विदेशी खेलाडी एनकोटो मासोआबीले दुई तथा फोडे फोफानाले एक गोल गरेका थिए । खेलको चोथो मिनेटमा आसोआबीले गोल गर्दै जावलाखेललाई अग्रता दिलाए । बाँकी समयमा गोल फर्काउन प्रयास गरेको मनाङले ६ मिनेटको इन्जुरी समयमा थप दुई गोल बेहोर्‍यो । इन्जुरी समयको दोस्रो मिनेटमा समिराज थोकरको पासमा फोफानाले हेड गोल गरे । इन्जुरी समयकै छैटौँ मिनेटमा फोफानाले मिलाएको बललाई मासोआबीले गोलमा परिणत गरेका थिए । जारी लिगमा उनको यो छैटौैँ गोल हो । 

खुमलटारले आर्मीलाई हरायो
खुमलटार युथ क्लबले विभागीय टोली त्रिभुवन आर्मी फुटबल क्लबलाई ३–२ अन्तरले पराजित गरेको छ । दशरथ रंगशालामा खुमलटारलाई जित दिलाउन विदेशी खेलाडी मेसौके ओलुमोउले दुई गोल गरे । कप्तान रेजिन सुब्बाले एक गोल थपेका थिए । आर्मीका लागि नवयुग श्रेष्ठ र सुशान्त चौधरीले समान एक गोल फर्काए । तेस्रो जितपछि खुमलटारले ९ खेलबाट १० अंक जोडेको छ । यता, तेस्रो हार बेहोरेको आर्मीको १२ अंक छ । 

खेलको सातौँ मिनेटमा मेसौकेले खुमलटारलाई अग्रता दिलाए । १८औँ मिनेटमा नवयुगले पेनाल्टीमार्फत बराबरी गोल गरे । २७औँ मिनेटमा मेसौकेले व्यक्तिगत दोस्रो गोल गर्दा खुमलटारले पहिलो हाफमा २–१ को अग्रता बनायो । ५२औँ मिनेटमा रेजिनले तेस्रो गोल गरे । सुशान्तले अन्तिम मिनेटमा एक गोल गरे पनि आर्मीको हार टार्न सकेनन् । 

रेफ्रीकै कारण क्लब डुब्न सक्छ : शाक्य 
खेलपछि एनआरटीका प्रशिक्षक राजुकाजी शाक्यले नेपाली फुटबल विकासमा रेफ्रीको पनि हात रहने र उनीहरूले निष्पक्ष भूमिका खेल्नुपर्ने बताए । ‘फुटबलमा रेफ्रीको निर्णय नै अन्तिम हुन्छ । तर, उनीहरूले आफूलाई सुधार गर्नुपर्छ । बारम्बार रेफ्रीको गल्तीका कारण क्लब डुब्ने स्थिति सिर्जना हुन्छ,’ रेफ्रीको विषयमा खासै प्रतिक्रिया नजनाउने शाक्यले शनिबार दुखेसो पोखे । ‘म खासै रेफ्रीको विषयमा त्यति बोल्दिनँ । तर, आज बोल्नैपर्ने भयो । स–साना गल्तीमा पनि खेल रोकिरहेका छन्,’ उनले निराशा जनाए । ‘हामी रेलिगेसन क्षेत्रमा रहेको टोलीलाई सानातिना गल्तीले पनि धेरै समस्या हुन्छ । संकटाविरुद्ध पनि यस्तै निर्णय भएको थियो, जसका कारण हामी संकटाविरुद्ध हार्न पुग्यौँ,’ शाक्यले भने । लिगको ५३औँ खेलमा एनआरटी संकटासँग २–१ ले पराजित भएको थियो । लिगमा रेफ्रीमाथि दुई क्लब मात्रै हैन, अन्य क्लबले पनि दुखेसो पोखेका छन् । पहिलोपटक ए डिभिजन लिग खेल्दै गरेको चर्च ब्वाइज युनाइटेड, त्रिभुवन आर्मी क्लब, फ्रेन्ड्स क्लबले यसअघि प्रश्न तेस्र्याउँदै आएका छन् । 

See More On

सुझावित समाचार