अति कम विकसित मुलुकहरूको सम्मेलनमा सहभागी हुन कतारको दोहा पुगेका उपप्रधानमन्त्री नारायणकाजी श्रेष्ठले संयुक्त राष्ट्रसंघ तथा युरोपेली युनियनका उच्च अधिकारीहरूसँग भेटवार्ता गरेका छन् । सबै भेटवार्तामा नेपालसँग राष्ट्रसंघ र युरोपेली युनियनको सम्बन्ध, विकासशील मुलुकमा स्तरोन्नति हुन लागेको नेपाललाई सहयोगलगायतका विषयमा छलफल भएको परराष्ट्र मन्त्रालयले जनाएको छ ।
श्रेष्ठले राष्ट्रसंघका उपमहासचिव रबाब फतिमा, राष्ट्रसंघीय महासचिवका प्रकोपजन्य जोखिम न्यूनीकरणसम्बन्धी विशेष प्रतिनिधि मामी मिजुतोरी, अन्तर्राष्ट्रिय साझेदारीसम्बन्धी युरोपियन युनियनका आयुक्त जुत्ता युरपिलाइनेन, राष्ट्रसंघीय सहायक महासचिव ओस्कार फर्नान्डेजसँग बेग्लाबेग्लै भेटवार्ता गरेका छन् ।
विकास लक्ष्य कार्यान्वयन, नेपालको विकासशील मुलुकमा स्तरोन्नतिलगायत द्विपक्षीय विषयमा छलफल भएको परराष्ट्र मन्त्रालयले ट्विटरमा जनाएको छ । श्रेष्ठले २० फागुनमा अति कम विकसित मुलुक (एलडिसी) हरूको सम्मेलनलाई दोहामा सम्बोधन गरेका थिए । उनले नेपाल तीन वर्षपछि विकासशील मुलुकमा स्तरोन्नति हुन लागेका सन्दर्भमा सबैसँग सहयोगका लागि आह्वान गरेका थिए ।
