राष्ट्रपति चयनका लागि २५ फागुनमा हुने निर्वाचनलाई केन्द्रित गरेर आठ दलीय गठबन्धनले गण्डकी प्रदेशको राजधानी पोखरामा प्रदेश सभा सदस्यहरुको लागि अभिमुखीकरण कार्यक्रम गरेको छ ।
आठ दलीय गठबन्धनले सवै प्रदेशका राजधानीमा आफ्ना पार्टीका प्रदेश सभा सदस्यहरुको लागि अभिमुखीकरणका क्रममा पोखरामा कार्यक्रम गरेको हो । कार्यक्रममा शीर्ष नेताहरुले राष्ट्रपतिमा कांग्रेसका उम्मेदवार रामचन्द्र पौडेललाई मत दिन प्रदेश सांसदहरुलाई आग्रह गरे ।
संविधानको पालना गदै अभिभावकीय भूमिका निर्वाह गर्ने राष्ट्रपति आवश्यक रहेकाले पौडेल नै उपयुक्त पात्र रहेको नेताहरुको तर्क छ । वर्तमान आठ दलीय गठबन्धन राष्ट्रपति निर्वाचनका लागि मात्र नभएको भन्दै उनीहरुले देशलाई स्थिरता, आर्थिक समृद्धि, सुशासन कायम गर्ने लगायतका उद्देश्य पूरा गर्न समेत आवश्यक रहेको बताएका थिए ।
६० सदस्यीय गण्डकी प्रदेश सभामा आठ दलीय गठबन्धनमा नेपाली कांग्रेसका २७, माओवादी केन्द्रका आठ र एकीकृत समाजवादीका एक सांसद रहेका छन् ।
कार्यक्रममा कांग्रेस केन्द्रीय उपसभापति धनराज गुरुङले देशमा आइपरेका समस्या समाधानका लागि गठबन्धन बनेको जिकिर गरे । उनले भने, ‘देशमा देखापरेका विविध समस्या समाधानको लागि आठ दलको गठबन्धन बनेको हो । यो २५ गते हुने निर्वाचनका लागि मात्र बनेको होइन । अरु दलहरु पनि थपिने प्रकृयामा छन् ।’
त्यसैगरी माओवादी केन्द्रका महासचिव देव गुरुङले विभिन्न आन्दोलनबाट प्राप्त उपलब्धिको रक्षा गदै देशलाई स्थिरता, स्थायित्व र आर्थिक विकास दिन अहिलेको गठबन्धन बनेको जिकिर गरे । ‘यो गठबन्धन २५ गते हुने निर्वाचनको लागि मात्र होइन । राष्ट्रपतिको निर्वाचनपछि हुने उपराष्ट्रपतिको निर्वाचनसँगै विभिन्न समयमा गरिएका आन्दोलनबाट प्राप्त उपलब्धिको रक्षा गदै देशलाई स्थिरता, स्थायित्व, आर्थिक विकास, समृद्धिलगायतका लागि गठबन्धन बनेको हो,’ उनले भने ।
