कार्यभार सम्हाल्न आइपुगे चिनियाँ राजदूत

नेपालका लागि नवनियुक्त चिनियाँ राजदूत चेन सोङ आइतबार काठमाडौं आइपुगेका छन् । उनी बेइजिङबाट काठमाडौं अवतरण गरेका हुन् । त्रिभुवन अन्तर्राष्ट्रिय विमानस्थलमा संक्षिप्त मन्तव्य दिने क्रममा राजदूत सोङले चीनको २२औँ राजदूतका रूपमा सुन्दर देश नेपाल आउन पाउँदा खुसी लागेको बताएका छन् । दुई देशको शीर्ष नेतृत्वबीच भएका विगतमा समझदारी कार्यान्वयन गर्न आफू सक्रिय रहने राजदूतले स्पष्ट पारेका छन् । 

राजदूत सोङले हिमाल र नदीले जोडिएको चीन र नेपालबीच चिरकालीन मित्रता रहेको बताएका छन् । उनले विगतमा चिनियाँ प्रख्यात भिक्षु फक्सियन र नेपाली प्रख्यात भिक्षु बुद्धभद्रले गरेको भ्रमणको आदानप्रदान उल्लेख गर्दै प्रसिद्ध नेपाली शिल्पकार अरनिको चीन आएर बेइजिङमा मियाओइङ मन्दिर निर्माण गरेको इतिहास स्मरण गरे । सन् १९५५ मा कूटनीतिक सम्बन्ध स्थापना भएदेखि नै नेपाल र चीनले एक–अर्कालाई सम्मान, विश्वास र समर्थन गर्दै आएको पनि उनले उल्लेख गरेका छन् । 

०७२ मा नेपालमा गएको आम विनाशकारी भूकम्प र तीन वर्षयता कोभिड– १९ विरुद्धको लडाइँको संकटपूर्ण घडीमा दुई देशले समान व्यवहार, मैत्रीपूर्ण सहयोग र पारस्परिक लाभको उदाहरण प्रस्तुत गर्दै एक–अर्कालाई आपसी सहयोग गरेको पनि राजदूत सोङले बताएका छन् । उनले सन् २०१९ मा चिनियाँ राष्ट्रपति सी जिनपिङले नेपालको राजकीय भ्रमण गरेको, दुई राष्ट्रप्रमुखले विकास र समृद्धिका लागि सदा चिरस्थायी मित्रतासहितको सहकार्यको रणनीतिक साझेदारी निर्माण गर्न सहमत भएको उल्लेख गरेका छन् ।