- वि.सं २o७९ कार्तिक २३ बुधबार
मोरङमा चुनावी प्रतिस्पर्धा गरिरहेका एकजना उम्मेदवारको मृत्यु भएको छ ।मोरङको ३ (क) निर्वाचन क्षेत्रबाट प्रदेश सभामा नेपाली कांग्रेसको तर्फबाट उम्मेदवार बनेर चुनावी प्रतिस्पर्धा गरिरहेका ५८ वर्षीय उम्मेदवार शेखरचन्द्र थापाको उपचारका क्रममा बुधबार बिहान निधन भएको हो । निमोनियाका बिरामी रहेका थापा एक महिनादेखि अस्पतालमा भर्ना भएर उपचार गराइरहेका थिए । उनलाई विशेष उपचार कक्षमा अक्सिजन दिएर उपचार गरिएको थियो ।
उम्मेदवार थापा प्रदेश १ मा गठबन्धनको सरकारका वन, वातावरण तथा भूसंरक्षणमन्त्री पनि हुन् । उनलाई ०७४ को निर्वाचनमा नेपाली कांग्रेसले समानुपातिकतर्फबाट प्रदेश सांसद बनाएको थियो । मोरङको पथरीशनिश्चरे नगरपालिका घर भएका थापा उम्मेदवारी दर्ता गराएकै दिनदेखि बिरामी परेका थिए । उनलाई उपचारका लागि विराटनगरस्थित नोबेल अस्पतालमा भर्ना गरिएको थियो ।
निमोनियाले सिकिस्त भएपछि उम्मेदवार थापालाई थप उपचारका लागि हेलिकाेप्टर चार्टर गरेर काठमाडाैं लगिएको थियो । काठमाडौंमा उपचार भएपछि उनलाई बेडरेस्टका लागि उनकै इच्छानुसार पुनः विराटनगरको नोबेल अस्पतालमा ल्याइएको थियो ।
अस्पतालमा उनले आफ्नो पार्टी र उम्मेदवारीको चिन्ता गर्दै चुनावी प्रतिस्पर्धाका लागि भेटघाट तीव्र बनाएका थिए ।
०५७ देखि कांग्रेस पार्टीको सक्रिय राजनीतिमा सहभागी थापाले आठ वर्षसम्म स्वर्गीय गिरिजाप्रसाद कोइरालाको निजी सहयोगी बनेर योगदान गरेका थिए । उम्मेदवार थापाले ०७० सालमा प्रतिनिधिसभामा एमालेका चण्डी राईसँग पराजय भोगेका थिए । यसपालि प्रत्यक्षतर्फबाट विजयी बनेर प्रदेश सांसद बन्ने उनको धोको थियो ।
