- वि.सं २o८१ बैशाख २० बिहीबार
‘टिफिन टाइम’मा विद्यार्थीलाई कोमल वलीको चुनावी क्लास
११ जेठ ०६८ मा सरकारले गरेको ‘विद्यालय शान्ति क्षेत्र’ घोषणा पूर्ण कार्यान्वयन गर्ने प्रतिबद्धता प्रमुख दलहरूले सार्वजनिक रूपमै गरेका थिए । ‘विद्यालय शान्ति क्षेत्र’ घोषणाका तीनमध्ये एक उद्देश्य थियो– विद्यालयलाई दलगत राजनीति तथा अन्य हस्तक्षेपबाट मुक्त राख्नु । तर, यतिवेला दलका उम्मेदवार विद्यालयभित्रै घुसेर विद्यार्थीलाई चौरमा भेला गराई चुनावी प्रचार गरिरहेका छन्, जुन निर्वाचन आयोगले तोकेको आचारसंहिताको पनि खिलापमा छ ।
निर्वाचन आचारसंहिता, २०७९ को दफा ४ (ग) मा ‘कुनै सरकारी कार्यालय वा सामुदायिक विश्वविद्यालय वा विद्यालय क्षेत्रको प्रयोग गरी निर्वाचनसम्बन्धी भेला वा प्रचार–प्रसार गर्न वा गराउन नहुने’ उल्लेख छ ।
एमालेबाट दाङ ३ मा प्रतिनिधिसभा सदस्य उम्मेदवार कोमल वली र ३ (ख) प्रदेश सभा सदस्य उम्मेदवार हुकुम बस्नेतले बिहीबार बबई गाउँपालिका– १ गँगटेस्थित सरस्वती जनता माविको प्रांगणमा विद्यार्थी भेला गराएर आफ्ना अभिभावकलाई सूर्य चिह्नमा भोट हाल्न लगाउन भनेका छन् । उनीहरूले बालबालिकालाई एमालेको पोस्टर–पम्प्लेट वितरण, भाषण तथा नाचगान गरे । वलीले भने आफू कलाकारको हैसियतमा विद्यालय पुगेको दाबी गरेकी छिन् ।
‘विद्यालयवरपरको बस्तीमा मेरो चुनावी अभियान चलिरहेका वेला मलाई देखेपछि विद्यार्थीले नै बोलाए । लामो समय सञ्चारकर्ममा रहेकी र हजारभन्दा धेरै गीत गाएकी म विशुद्ध राजनीतिकर्मी मात्रै नभई गायिका पनि हुँ । विद्यार्थी भाइबहिनीले गायिकाको रूपमा गीत गाउन अनुरोध गरेपछि मैले गीत पनि गाएँ । चुनावबारे पनि केही विद्यार्थीको सोध्नुभएकाले त्यसको जिज्ञासा पनि मेटाएँ । तर, मैले विद्यार्थीसँग भोट मागिनँ,’ उनको दाबी छ ।
