- वि.सं २o८१ बैशाख १८ मंगलबार
प्रधानमन्त्री शेरबहादुर देउवाले जसपाका चार मन्त्री बर्खास्त गरेलगत्तै मधेस प्रदेशका मुख्यमन्त्री लालबाबु राउतले प्रदेश सरकारमा रहेका कांग्रेस, माओवादी र एकीकृत समाजवादीका मन्त्री हटाउने तयारी गरेका छन्।
मधेस सरकारमा कांग्रेसका तीन, माओवादीका दुई मन्त्री र एक राज्यमन्त्री, एकीकृत समाजवादीका दुई मन्त्री र एक राज्यमन्त्री छन्।
सत्तागठबन्धनमा रहेको जसपाले प्रतिनिधिसभा र प्रदेश सभा निर्वाचनमा एमालेसँग गठबन्धन गरेपछि प्रधानमन्त्री देउवाले जसपाका चार मन्त्रीलाई आज हटाएका हुन्। त्यसको काउन्टरमा मधेस सरकारमा सहभागी कांग्रेस, माओवादी र एकीकृत समाजवादीका मन्त्री हटाउन लागिएको जसपाका एक मन्त्रीले जानकारी दिए। मधेस सरकारको नेतृत्व जसपाले गर्दै आएको छ।
मुख्यमन्त्री राउतले आज ती दलबाट सरकारमा सहभागी मन्त्रीहरूलाई राजीनामा दिन भनेका छन्। राजीनामा नदिए उनीहरूलाई हटाउने राउतको तयारी छ।
संघ सरकारले आफ्ना मन्त्रीलाई हटाएपछि जसपा अध्यक्ष उपेन्द्र यादवले मुख्यमन्त्री राउतलाई प्रदेश सरकारबाट पनि ती दलका मन्त्री हटाउन निर्देशन दिएको बुझिएको छ।
