- वि.सं २o७९ असोज २६ बुधबार
नेपालले चार महिनामा झन्डै आठ अर्बको विद्युत् भारतीय बजारमा बिक्री गरेको छ । नेपाल विद्युत् प्राधिकरणले देशभित्र खपत गरी अतिरिक्त भएको विद्युत् १९ जेठबाट इन्डियन इनर्जी एक्सचेन्ज लिमिटेड (आइएक्स)को डे–अहेड बजारमा बिक्री सुरु गरेको हो । २५ असोजसम्म सात अर्ब ९३ करोड २२ लाख रुपैयाँ खुद आम्दानी गरेको प्राधिकरणका कार्यकारी निर्देशक कुलमान घिसिङले बताए ।
यस अवधिमा एक अर्ब ३० लाख युनिट विद्युत् निर्यात भएको छ । ‘विद्युत् निर्यात एक अर्ब युनिट नाघ्नु हाम्रा लागि अर्को कोसेढुंगा हो,’ घिसिङले भने, ‘निर्यात गरिएको विद्युत्को प्रतियुनिट औसत मूल्य सात रुपैयाँ ९१ पैसा रहेको छ ।’
प्राधिकरणले सुरुमा दुइटा विद्युत्गृहको ३९ मेगावाट उत्पादित विद्युत्लाई स्रोत मानी दैनिक आइएक्समा बिक्री गरिएको थियो । त्यसपछि २७ जेठबाट ६ जलविद्युत् गृहबाट उत्पादित विद्युत्लाई स्रोत मानी दैनिक रूपमा ३६४ मेगावाट भारतीय बजारमा प्रतिस्पर्धी दरमा बिक्री हुँदै आएको छ ।
भारतसँगको विद्युत् व्यापार भारतीय रुपैयाँ (भारु)मा हुने भएकाले यस अवधिमा विद्युत् बिक्रीबाट चार अर्ब ९५ करोड ७६ लाख भारु नेपाल भित्रिएको छ । यसबाट नेपालको विदेशी मुद्रा सञ्िचति र दुई मुलुकबीचको व्यापार घाटालाई कम गर्न योगदान पुगिरहेको छ । प्राधिकरणले चालू आर्थिक वर्षमा विद्युत् निर्यातबाट करिब १६ अर्ब रुपैयाँ आम्दानी गर्ने लक्ष्य राखेको छ । आइएक्समा २४ घन्टालाई १५–१५ मिनेटको ९६ वटा ब्ल्कमा विभाजन गरी बजारले तय गरेको प्रतिस्पर्धी दरमा विद्युत्को कारोबार गरिन्छ ।
