- वि.सं २o७९ असोज २० बिहीबार
गृहमन्त्री बालकृष्ण खाणले मंगलबार रातिबाट परेको निरन्तरको वर्षाका कारण गएको बाढी, पहिरो र डुबानपीडितलाई यथाशक्य उद्धार, उपचार, राहतको व्यवस्था गर्न गृह प्रशासन, सुरक्षा निकाय र सम्बन्धित जिल्ला प्रशासन कार्यालयलाई निर्देशन दिएका छन् ।
गृहमन्त्री खाणले गृहसचिव विनोदप्रकाश सिंह, नेपाल प्रहरी, सशस्त्र प्रहरीका महानिरीक्षक, जिल्ला प्रशासन कार्यालय तथा सम्बन्धित प्रदेशका सुरक्षा निकायका प्रमुखलाई टेलिफोन गर्दै सरकारको प्रमुख दायित्व भनेको नागरिकको जिउधन र सम्पत्तिको रक्षा भएकाले त्यसमा कुनै कसर बाँकी नराख्न निर्देशन दिएका हुन् ।
उनले अर्घाखाँची, प्युठान, रुपन्देही, दाङलगायतका जिल्लाका प्रमुख जिल्ला अधिकारीसँग बाढी, पहिरो र डुबानले पुर्याएकाे जनधनको क्षतिबारे जानकारी लिएको गृह मन्त्रालयका प्रवक्ता फणीन्द्रमणि पोखरेलले जानकारी दिए ।
उनले प्राकृतिक प्रकोपमा परेका जनताको उद्धार, उपचार र राहतका जिल्लामा भएको स्रोतसाधनको उपयोग गर्न र नपुगेको अवस्थामा तत्कालका लागि आवश्यक पर्ने स्रोतसाधनको मन्त्रालयमा माग गर्न निर्देशन दिए ।
