मुख्य समाचारफ्रन्ट पेजसमाचारनयाँ यात्रा २०२५दृष्टिकोणअर्थअन्तर्वार्ताखेलकुदविश्वफिचरप्रदेश
  • वि.सं २o७९ असोज १७ सोमबार
  • Friday, 11 July, 2025
२o७९ असोज १७ सोमबार २o:o६:oo
Read Time : < 1 मिनेट
विश्व डिजिटल संस्करण

अफगानिस्तानमा पाकिस्तानी मुद्रामाथि प्रतिबन्ध

Read Time : < 1 मिनेट
नयाँ पत्रिका
२o७९ असोज १७ सोमबार २o:o६:oo

अफगानिस्तानको तालिबान प्रशासनले  पाकिस्तानी मुद्राको प्रयोगमा प्रतिबन्ध लगाएको छ। अफगानिस्तान र पाकिस्तानबीचको सम्बन्धमा उल्लेख्य तनाव वृद्धि भएपछि तालिबानले पाकिस्तानी रुपैयाँको प्रयोगमा प्रतिबन्ध लगाएको हो।

अफगान समाचार संस्था खामा प्रेसका अनुसार पाकिस्तानी मुद्रामाथिको प्रतिबन्ध अक्टोबर १ तारिख शनिबारदेखि लागू भएको छ। 

तालिबान गुप्तचर निकायले अफगानिस्तानमा आर्थिक लेनदेनमा पाकिस्तानी रुपैयाँको प्रयोगलाई पूर्ण रूपमा प्रतिबन्धित गरिएको घोषणा गरेको छ।

यो आदेश तालिबानको सम्पत्ति शुद्धीकरण ‘एन्टी मनी लाउन्ड्रिङ’ शाखाले मनी एक्सचेन्ज एसाेसिएसनलाई जानकारी गराएको थियो।

यस आदेशअनुसार स्थानान्तरण, व्यापार र मुद्रा विनिमयसहित सबै वित्तीय लेनदेनहरूलाई सीमित मात्र नगरी निषेधित गरिएको छ।

प्रतिवेदनमा मुद्रा सटही डिलरलाई पाँच लाख रुपैयाँभन्दा बढीको कारोबार गर्न प्रतिबन्ध लगाइएको उल्लेख छ। तोकिएको रकमभन्दा बढी रकम फेला परेमा डिलरलाई कानुनी कारबाही हुन सक्छ। 

गत वर्षको अगस्टमा तालिबानले सत्ता कब्जा गरेयता दुई देशबीचको सम्बन्धमा विभिन्न कारणले तिक्तता आएको छ, जसमा बढ्दो सीमा संघर्ष र पाकिस्तानमा प्रतिबन्धित तेहरिक–ए–तालिबान पाकिस्तान (टिटिपी) को पुनः उदय पनि समावेश छ।

हालै तालिबानले पाकिस्तानले भूपरिवेष्टित देशमा आफ्नो हवाई क्षेत्र अमेरिकी ड्रोनले प्रयोग गर्न अनुमति दिएको आरोप लगाएको थियो।

अफगानिस्तानमा अमेरिकी हवाई आक्रमणका लागि अनुमति दिएबापत पाकिस्तानले ठूलो रकम प्राप्त गरेको तालिबान समूहले दाबी गरेको छ।

जुलाई ३१ मा, अमेरिकाले अफगानिस्तानमा एक सटीक प्रतिआतंकवाद आक्रमण गरेको थियो जसमा ओसामा बिन लादेनका सहायक र अल–कायदाका नेताको उत्तराधिकारी अयमान अल–जवाहिरीको मृत्यु भएको थियो। 

यसैबीच, पाकिस्तानले टिटिपीले आक्रमण पुनः सुरु गर्नुमा तालिबान शासनलाई दोषी ठहर्‍याएको छ, जसले देशको सुरक्षा स्थितिलाई अझ खराब बनाएको छ।

पाकिस्तानमा यो वर्ष एकै महिनामा सबैभन्दा धेरै आतंकवादी घटना सेप्टेम्बरमा भएको सञ्चारमाध्यमले जनाएका छन्।