- वि.सं २o७९ असोज ६ बिहीबार
डेंगु संक्रमणबाट काठमाडौंमा हालसम्म चारजनाले ज्यान गुमाइसकेका छन् भने बागमती प्रदेशमा मात्रै ११ जनाको मृत्यु भएको छ । स्वास्थ्य निर्देशनालय बागमती प्रदेशको तथ्यांकअनुसार बुधबारसम्ममा संक्रमणबाट ११ जनाको मृत्यु भएको हो ।
स्वास्थ्य निर्देशनालय बागमती प्रदेशका प्रमुख महेश्वर श्रेष्ठले डेंगुबाट काठमाडौंमा चार, ललितपुरमा दुई, सिन्धुपाल्चोकमा दुई, मकवानपुरका एक, सिन्धुलीमा एक र धादिङमा एकजनाको मृत्यु भएको जानकारी दिए ।
यसैगरी, प्रदेशमा हालसम्म १३ हजार तीन सय ७५ जना डेंगुका बिरामी फेला परेको छ । सबैभन्दा धेरै ललितपुर जिल्लामा चार हजार आठ सय ७८ मा बिरामी भएका छन् ।
यसैगरी, काठमाडौंमा चार हजार ६ सय ७४, मकवानपुरमा एक हजार आठ सय १०, भक्तपुरमा सात सय १३, चितवनमा चार सय २९ र धादिङमा तीन सय ९९ जना डेंगुको बिरामी फेला परेको स्वास्थ्य निर्देशनालयले जनाएको छ । रासस
