- वि.सं २o७९ भदौ २२ बुधबार
राष्ट्रिय सभाका चार विषयगत समितिको सभापतिका लागि उम्मेदवारी दर्ता भएको छ । बुधबार राष्ट्रिय सभाको विधायन व्यवस्थापन समितिको सभापतिमा नेकपा एकीकृत समाजवादीका महासचिवसमेत रहेका बेदुराम भुसालले उम्मेदवारी दिएका छन् भने राष्ट्रिय सरोकार समितिको सभापतिमा एमालेकी पार्वती रावल (दिलकुमारी) को उम्मेदवारी परेको छ । यसअघि पनि उनी नै सभापति थिइन्।
त्यस्तै, प्रत्यायोजित व्यवस्थापन तथा सरकारी आश्वासन समितिको सभापतिमा माओवादी केन्द्रका मायाप्रसाद शर्माको उम्मेदवारी परेको छ । यसअघि यो समितिको सभापतिमा रामनारायण बिडारी थिए। उनी कार्यकाल सकिएर १९ फागुन २०७८ मा बिदा भएपछि रिक्त रहेको सभापति पदमा माओवादी केन्द्रका शर्माले उम्मेदवारी दिएका हुन् ।
दिगो विकास तथा सुशासन समितिको सभापतिमा नेपाली कांग्रेसका प्रकाश पन्थको उम्मेदवारी परेको छ । निर्वाचन बिहीबार हुनेछ । राष्ट्रिय सभामा सत्तागठबन्धनको बहुमत छ ।
