एकताको गृहकार्य गरेका माओवादी र एकीकृत समाजवादीले १० सदस्यीय पार्टी एकता संयोजन समिति बनाउने भएका छन् । दुवै पार्टीबाट पाँच–पाँच सदस्य रहने गरी समिति बनाउने शीर्ष तहमा सहमति भएको छ ।
समितिमा माओवादीबाट अध्यक्ष प्रचण्ड, वरिष्ठ उपाध्यक्ष नारायणकाजी श्रेष्ठ, उपाध्यक्ष कृष्णबहादुर महरा, महासचिव देव गुरुङ र उपमहासचिव वर्षमान पुन समितिमा सदस्य रहने सम्भावना छ । एकीकृत समाजवादीबाट अध्यक्ष माधवकुमार नेपाल, सम्मानित नेता झलनाथ खनाल, उपाध्यक्ष प्रमेश हमाल, महासचिव डा. बेदुराम भुसाल र उपमहासचिव डा. गंगालाल तुलाधर समितिमा रहने सम्भावना छ ।
तर, माओवादी उपाध्यक्ष श्रेष्ठले संख्या र नाम टुंगो लाग्न बाँकी रहेको बताए । समितिले सुरुमा एकताको आवश्यकता र औचित्यबारे अवधारणापत्र सार्वजनिक गर्नेछ । लगत्तै समितिले निर्वाचनको घोषणापत्रलाई अन्तिम रूप दिनेछ ।