- वि.सं २०८१ बैशाख १३ बिहीबार
प्रदेश प्रशिक्षणका चार सन्देश
अहिलेकै गठबन्धनबीच आगामी निर्वाचनमा समेत तालमेल गर्ने पाँच दलको निर्णयपछि दबाबमा आएको प्रमुख विपक्षी दल एमालेले एकल बहुमतको लक्ष्यसहित सातवटै प्रदेशमा कार्यकर्ता प्रशिक्षण चलाइरहेको छ । प्रशिक्षणबाट स्थानीय चुनावको प्रतिरक्षात्मक मनोविज्ञानबाट पार्टीपंक्तिलाई आमचुनावका लागि आक्रामक तयारीमा उतार्ने एमालेको योजना छ ।
प्रदेश १, मधेस प्रदेश, बागमती, गण्डकी र कर्णालीको प्रशिक्षणपछि एमालेले मंगलबार सुदूरपश्चिम र बुधबार लुम्बिनी प्रदेशमा प्रशिक्षण आयोजना गरेको छ । पार्टी केन्द्रीय स्कुल विभागको संयोजन र वरिष्ठ उपाध्यक्ष ईश्वर पोखरेलसहित उपाध्यक्षहरूको नेतृत्वमा सञ्चालित सबै प्रदेशस्तरीय प्रशिक्षणमा अध्यक्ष केपी ओली आफैँ सहभागी हुँदै आएका छन् ।
उपमहासचिव तथा स्कुल विभागका प्रमुख प्रदीप ज्ञवालीले मूलतः चार उद्देश्यसहित अहिले पार्टीले प्रदेशस्तरीय प्रशिक्षण सञ्चालन गरिरहेको जानकारी दिए । ‘स्थानीय चुनावमा जनमतमा पहिलो भयौँ, तर पहिलेभन्दा सिट संख्यामा तल झर्यौँ, यसलाई तलसम्म बुझ्ने सवालमा एकरूपता ल्याउने गरी समीक्षात्मक सन्देश प्रवाह गर्ने पहिलो उद्देश्य छ । दोस्रो, स्थानीय चुनावमा तल देखिएका असमझदारी अन्त्य गर्ने उद्देश्य छ,’ उपमहासचिव ज्ञवालीले नयाँ पत्रिकासँग भने, ‘तेस्रो, सिंगो पार्टीपंक्तिलाई एकाग्र भएर चुनावमा लाग्न प्रेरित गर्ने र चौथो, निर्वाचित जनप्रतिनिधिलाई पार्टीको कार्यदिशाअनुसार काम गर्ने निर्देशित गर्ने उद्देश्य छ ।’
प्रशिक्षणको सवालमा जारी अन्तरपार्टी निर्देशनमा एमालेले प्रतिरक्षात्मक मनोविज्ञानबाट बाहिर ल्याएर आगामी चुनौती सामना गर्नका लागि सक्षम तुल्याउने भनिएको छ । निर्वाचनको परिणामपछि अनावश्यक रूपमा सिर्जित प्रतिरक्षात्मक मनोविज्ञानबाट कार्यकर्तापंक्तिलाई बाहिर ल्याई उनीहरूलाई आगामी चुनौतीका लागि सहज सामना गर्न सक्ने तुल्याउन तत्काल देशव्यापी प्रशिक्षण अभियान सञ्चालन गर्नु आवश्यक छ ।
स्थानीय चुनावमा प्राप्त ३४ प्रतिशत लोकप्रिय मतलाई १६ प्रतिशत वृद्धि गरेर आमचुनावमा ५० प्रतिशतसम्म पुर्याउने एमालेको महत्वाकांक्षी योजना छ । नयाँ पुस्तामा विशेष ध्यान, जनाधार बलियो भएको ठाउँमा जनाधारलाई सुदृढ र कमजोर भएको ठाउँमा विस्तारमा जोड दिने नीतिमार्फत लक्ष्य हासिल गर्न सकिने एमालेको विश्वास छ ।
प्रदेशस्तरीय प्रशिक्षणमा सम्बन्धित प्रदेशका केन्द्रीयस्तरका नेता, जनसंगठनका पदाधिकारीहरू, प्रदेशका पदाधिकारी र सदस्यहरू, प्रदेश सम्पर्क समन्वयका पदाधिकारी, जिल्ला कमिटीका पदाधिकारी, जिल्ला सम्पर्क मञ्चका अध्यक्षहरू, पालिका कमिटीका अध्यक्ष, सांसदहरू, जनप्रतिनिधि सहभागी हुँदै आएका छन् ।
जसअनुसार प्रदेश १ मा वरिष्ठ उपाध्यक्ष ईश्वर पोखरेल, मधेस प्रदेशमा उपाध्यक्ष सुरेन्द्र पाण्डे, बागमती प्रदेशमा उपाध्यक्ष विष्णु पौडेल, गण्डकी प्रदेशमा उपाध्यक्ष अष्टलक्ष्मी शाक्य, लुम्बिनी प्रदेशमा उपाध्यक्ष सुवासचन्द्र नेम्वाङ, कर्णाली प्रदेशमा उपाध्यक्ष रामबहादुर थापा र सुदूरपश्चिम प्रदेशमा उपाध्यक्ष युवराज ज्ञवालीलाई संयोजकको जिम्मेवारी तोकिएको छ । उपाध्यक्षहरूलाई आवश्यकताअनुसार जिल्लाहरूको प्रशिक्षणको तयारी गर्न र सहभागी हुनसमेत निर्देशित गरिएको छ ।
