- वि.सं २o७९ असार २२ बुधबार
मलेसियन कम्पनी विस्ट्रोन टेक्नोलोजीले शून्य लागतमा नेपाली कामदार लैजाने भएको छ । मंगलबार मलेसियन कम्पनी विस्ट्रोन र नेपाली दुई म्यानपावर कम्पनी (आकर्षण इन्टरनेसनल र लालधनुष इन्टरनेसनलबीच कामदार लैजाने विषयमा सम्झौता भएको छ । विस्ट्रोन सूचना प्रविधिका क्षेत्रमा स्थापित बहुराष्ट्रिय कम्पनी हो ।
विस्ट्रोन कम्पनीका जनरल म्यानेजर डेभिड, आकर्षण इन्टरनेसल कम्पनीका अध्यक्ष विष्णुबहादुर केसी र लालधनुष इन्टरनेसनलका तर्फबाट अध्यक्ष नवाङ शेर्पाले सम्झौतापत्रमा हस्ताक्षर गरेका छन् । सम्झौताअनुसार कामदारले कुनै पनि शुल्क भुक्तानी गर्नुपर्ने छैन । रोजगारदाता भिसा शुल्कदेखि लिएर हवाई टिकटको समेत व्यवस्था कम्पनीले गर्नेछ ।
कम्पनीका अनुसार पहिलो चरणमा तीन सय १५ महिला र एक सय ३५ पुरुषसहित नेपालबाट चार सय ५० कामदार लगिनेछ । जसमध्ये आकर्षण इन्टरनेसनल म्यानपावर कम्पनीले एक सय ४० महिला र ६० पुरुषको कोटा तोकेको छ । त्यस्तै, लालधनुष इन्टरनेसनल कम्पनीले भने एक सय ७५ महिला र ७६ पुरुष गरी दुई सय ५० जनाको कोटा पाएको छ ।
सो कम्पनीमा काम गर्ने कामदारले कम्तीमा करिब ७० हजार रुपैयाँ (२,४२१ रिंगरेट) पाउनेछ । कामदारको कामको आधारमा कम्पनीले अधिकतम ९२ हजार रुपैयाँ (३२२३ रिंगरेट) दिनेछ । कम्पनीका जनरल म्यानेजर डेभिडका अनुसार कामदारको न्यूनतम मासिक पारिश्रमिक करिब ४३ हजार रुपैयाँ हुनेछ । इन्सेन्टिभ अधिकतम करिब तीन हजार रुपैयाँ, ओभरटाइम २८ हजार रुपैयाँ र खानाको तीन हजार रुपैयाँसहित भुक्तानी गर्नेछ ।
मलेसियासहित चीन, ताइवान, सिंगापुर, फिलिपिन्स, मेक्सिको, चेक गणतन्त्र र भारतमा समेत आफ्नो फ्याक्ट्री सञ्चालन गरेको कम्पनीले जनाएको छ । मलेसियन यो कम्पनीले सन् २०१९ देखि उत्पादनको काम सुरु गरेको हो । मलेसियामा कम्पनीका दुई ठूला फ्याक्ट्री सञ्चालित छन् । कम्पनीमा ८० हजार कामदार कार्यरत छन् ।
