समाचार डिजिटल संस्करण

एक महिनादेखि खुम्बुमा बेपत्ता विदेशी पर्यटक अझै भेटिएनन्

सोलुखुम्बुको खुम्बु क्षेत्रमा बेपत्ता दुई विदेशी पर्यटकको खोजीकार्य प्रतिकूल मौसमका कारण प्रभावित भएको छ । गएको जेठ ५ गते खुम्बु भ्रमणमा आएका भारतीय नागरिक ३१ वर्षीय सिरनाथचन्द्र मोहन र कोरियन नागरिक ५० वर्षीय योहन सम्पर्कविहीन छन् । 

नेपाली सेनाको समेत सहयोगमा खोजीकार्यलाई तीव्रता दिएको भए पनि निरन्तरको वर्षात् र भौगोलिक कठिनाइका कारण खोजीकार्य प्रभावित भएको जिल्ला प्रहरी कार्यालय सोलुखुम्बुका प्रहरी नायब उपरीक्षक सुनीलजंग शाहले बताए । 

भिर तथा जंगलको क्षेत्र भएकाले खोजीकार्य चुनौतीपूर्ण बनेको छ । प्रहरीले हाल गोकियो, थाङबोचे र एभरेस्ट बेसक्याम्पमा तीन टोली बनाएर खोजी गरिरहेको शाहको भनाइ छ । भारत र कोरियाबाट आएका बेपत्ताका आफन्तहरू पनि खोजीमा लागिपरेका छन् ।  बेपत्ताहरू विनागार्ड भ्रमणमा आएका कारण अवस्था पत्ता लगाउन समस्या भएको जिल्ला प्रहरी कार्यालय सोलुखुम्बुले जनाएको छ ।