लगानीकर्ताकाे आन्दोलन तीव्र : सडकदेखि सदनसम्म दबाब
धितोपत्र बोर्डको मूलगेटमा अनशन बसेर सरकारलाई दबाब
पुँजीबजार सुधारको १९ बुँदे माग राखेर नेपाल धितोपत्र बोर्डको मूलगेटमा अनशनरत लगानीकर्ता तिलक कोइराला
नेप्से परिसूचक १९ महिनायताकै न्यून बिन्दुमा आइपुगेपछि लगानीकर्ताले आन्दोलनलाई तीव्रता दिएका छन् । लगानीकर्ताले १९ बुँदे माग राख्दै सडकदेखि सदनसम्म दबाब दिइरहेका छन् । लगानीकर्ता तिलक कोइरालाले सात दिनदेखि नेपाल धितोपत्र बोर्डको मूलगेटमा अनशन बसेर सरकारलाई दबाब दिइरहेका छन् ।
सोमबार पुँजी बजारको विषयलाई लिएर प्रधानमन्त्रीलाई नेपाली कांग्रेसका दुई महामन्त्री गगनकुमार थापा र विश्वप्रकाश शर्माले ध्यानाकर्षण गराएका छन् । मन्त्री थापाले यसअघि पनि सदनमा लगानीकर्ताको मागलाई सम्बोधन गर्न आग्रह गरेका थिए ।
त्यस्तै, प्रतिपक्ष नेकपा एमाले सचेतक विशाल भट्टराईले पुँजी बजार संकटपूर्ण अवस्थामा गुज्रिएको भन्दै पुनरुत्थान गर्न जरुरी भएको बताए । सडकदेखि सदनसम्म आवाज उठ्न थालेपछि नेपाल धितोपत्र बोर्डले लगानीकर्ताको जायज मागलाई तीन महिनाभित्र पूरा गर्ने प्रतिबद्धता व्यक्त गरेको छ ।
बोर्डअघि धर्ना दिएर बसेका लगानीकर्ता आक्रोशित
मंगलबार पत्रकार सम्मेलन गर्दै बोर्डका अध्यक्ष रमेशकुमार हमालले लगानीकर्ताले उठाउँदै आएका जायज मागहरू सम्बोधन गर्न तीन महिनादेखि काम गरिरहेको र अबको तीन महिनाभित्र सम्बोधन हुने बताए ।
अध्यक्ष हमालले सेयर धितो कर्जामा ४–१२ करोडको सीमा र जोखिम भार बढाउँदा सेयर बजार प्रभावित भएको बताए । अध्यक्ष हमालले पत्रकार सम्मेलनमार्फत लगानीकर्ताको उठाएका जायज माग तीन महिनाभित्र सम्बोधन गर्ने बताएपछि बोर्डअघि धर्ना दिएर बसेका लगानीकर्ता आक्रोशित भएका छन् । सेयर बजार दबाब समूहका महासचिव नयन बाँस्तोलाले सरकारले लगानीकर्ताको ज्यान र लगानीमाथि खेलबाड गरेको बताए ।