मेयर बालेनको चुनाव खर्च तीन लाख ९४ हजार, मतगणना ढिलाइले बढी खर्च भएकोप्रति ध्यानाकर्षण
काठमाडौं महानगरपालिकाका मेयर बालेन्द्र साहले आफ्नो चुनावी खर्च सार्वजनिक गरेका छन् । सोमबार चुनावी खर्चको लिस्ट उनले सामाजिक सञ्जाल फेसबुकमा पनि राखेका छन् ।
खर्चको विवरण केही समयअघि नै सार्वजनिक हुनुपर्ने, तर विभिन्न कारणले ढिलो भएकोमा क्षमा माग्दै मेयर साहले खर्च विवरण सार्वजनिक गरेका छन् । उनको चुनावी खर्च तीन लाख ९४ हजार चार सय ८९ रहेको जनाएका छन् ।
मतगणनाको समयमा मात्रै एक लाखभन्दा बढी खर्च भएको भन्दै मतगणना ढिलो हुनुले निर्वाचन प्रक्रियालाई लामो र बोझिलो मात्र नभई उम्मेदवारका लागि महँगो भएको बताए । यसमा सबैको ध्यान जान जरुरी रहेको उनको भनाइ छ ।
उनले एउटा उम्मेदवारका रूपमा आफूले पाएको साथ र विश्वास संसारको सबैभन्दा शक्तिशाली कम्प्युटरले जस्तोसुकै तालिकामा कुनै पनि संख्या राखेर देखाउन नसक्ने दाबी गरे । अमूल्य साथ र विश्वासले दिएको जिम्मेवारी पूरा गराउन आफू हरसमय खटिरहने प्रतिबद्धतासमेत व्यक्त गरेका छन् ।