- वि.सं २o७९ जेठ १० मंगलबार
सिराहाको गोलबजार नगरपालिकामा नेकपा एमाले विजयी भएको छ। गोलबजार नगरपालिका प्रमुखमा नेकपा एमालेबाट श्याम श्रेष्ठ दुई हजार दुई सय सात मतान्तरले विजयी भएका हुन् । उनले सात हजार नौ सय आठ मत पाएका छन् भने निकटतम प्रतिद्वन्द्वी नेकपा माओवादी केन्द्रबाट निवर्तमान प्रमुख देवनाथ साहले पाँच हजार सात सय एक मत पाएका छन् । नेपाली कांग्रेसका राजदेव साह हलुवाईले चार हजार ६ सय ५९ मत पाएका छन् ।
उपप्रमुखमा नेकपा एमालेवाट मान्ती साह दुई हजार ६० मतान्तरले विजयी भएकी छिन् । उनले सात हजार सात सय तीन मत पाएकी छिन् भने निकटतम प्रतिद्वन्द्वी नेकपा माओवादी केन्द्रका निवर्तमान उपप्रमुख रेशमकुमारी थापाले पाँच हजार ६ सय ४३ र नेपाली कांग्रेसकी शान्ति सदायले चार हजार नौ ६५ मत पाएकी छिन् ।
यससँगै सिराहा जिल्लाको १७ वटै स्थानीय तहको अन्तिम मतपरिणाम सार्वजनिक भएको छ । गत वैशाख ३० गते गोलबजार नगरपालिका– ११ मा वर्षाको कारणले करिब चार सय मतदाताले मत खसाल्न नसक्दा जेठ ३ मा चुनाव भएको थियो । ढिलो गरी चुनाव भएर मतपरिणाम सार्वजनिक गर्न ढिलाइ भएको निर्वाचन अधिकृतको कार्यालय गोलबजारले जनाएको छ ।
