- वि.सं २o७९ जेठ ५ बिहीबार
दोलखाको कालिञ्चोक गाउँपालिकामा अध्यक्ष र उपाध्यक्ष पदमा गठबन्धनका उम्मेदवार विजयी भएका छन् । कालिञ्चोक गाउँपालिकामा गठबन्धनबाट अध्यक्षका उम्मेदवार नेपाली कांग्रेसका अर्जुनप्रसाद सिवाकोटी र नेकपा माओवादी केन्द्रबाट कुलबहादुर बुढाथोकी उपाध्यक्षमा निर्वाचित भएका हुन् ।
अध्यक्षमा निर्वाचित अर्जुनप्रसाद सिवाकोटी नेकपा एमालेका उम्मेदवार गणेश सिवाकोटीलाई पराजित गर्दै पालिका अध्यक्ष बनेका हुन् भने बुढाथोकी एमालेकी उम्मेदवार कविता थामीलाई पराजित गर्दै पालिका उपाध्यक्ष बनेका हुन् ।
निर्वाचन अधिकृतको कार्यालय कालिञ्चोकका अनुसार अध्यक्ष उम्मेदवार अर्जुन सिवाकोटीले एमालेका गणेश सिवाकोटीलाई एक हजार एक सय १३ मतले पछि पार्दै जित हात पारेका छन् । उनले पाँच हजार सात सय ८६ मत पाए भने प्रतिस्पर्धी एमाले उम्मेदवार गणेशले चार हजार ६ सय ७३ मत प्राप्त गरेका छन् ।
त्यस्तै, उपाध्यक्ष पदमा कुलबहादुर बुढाथोकीले पाँच हजार सात सय १८ मत प्राप्त गरी विजयी हुँदा एमालेकी कविता थामीले चार हजार नौ सय ७१ मत प्राप्त गरेकी छिन् । कालिञ्चोकका नाैवटा वडामध्ये कांग्रेस चार, माओवादी केन्द्र चार र एमालेले एउटा वडामा जित हात पारेको छ ।
