समाचार संकलन गर्न गएकी पत्रकार प्रहरी नियन्त्रणमा 

अठार महिनाकी नाबालिकालाई बलात्कार गर्ने दाजुभाइलाई कडा कारबाहीको माग गर्दै राजमार्गमा प्रदर्शन भएको समाचार संकलन गर्न गएकी एक महिला पत्रकारलाई प्रहरीले पक्राउ गरेर थुनामा राखेको छ ।  

सुन्दरहरैँचा नगरपालिका–  ७ गणेशपुरकी १८ महिनाकी   नाबालिकालाई २७ फागुनमा बलात्कार गरेर हत्या गर्ने  दाजुभाइ  २८ वर्षीय मिथुन चौधरी र २५ वर्षीय अजय चौधरीलाई कडा कारबाहीको माग गर्दै मंगलबार साँझ पूर्व–पश्चिम राजमार्गमा प्रदर्शन भएको थियो । सोहीे प्रदर्शनको समाचार संकलन गर्न पुगेकी पूर्वीकमान्ड डटकममा आबद्ध पत्रकार सम्झना राईलाई प्रहरीले पक्राउ गरेको हो । उनीसहित अन्य दुई युट्युबर गरी प्रहरीले ११ जनालाई शान्ति व्यवस्थामा खलल पुर्‍याएको र अभद्र व्यवहार गरेकाे आरोपमा मुद्दा दर्ता गर्ने तयारी गरेको छ । 

अविलम्ब रिहाइको माग 
पत्रकार राईलाई विनाकारण पक्राउ गरेको भन्दै उनलाई अविलम्ब रिहा गर्न मोरङका पत्रकारहरूले माग गरेका छन् । समाचार संकलन गर्न गएकी पत्रकारलाई प्रहरीले पक्राउ गरेर अभद्र व्यवहारमा मुद्दा दर्ता गराउनु प्रेस स्वतन्त्रताविरोधी कार्य  भएको भन्दै आदिवासी–जनजाति पत्रकार महासंघ (फोनिज) मोरङ र प्रेस सेन्टर मोरङले पत्रकार राईलाई तुरुन्त रिहा गर्न माग गरेका छन् । 

प्रेस सेन्टर मोरङका अध्यक्ष अर्जुन आचार्य र फोनिज मोरङका सचिव अनिल श्रेष्ठले  पत्रकार राईलाई तुरुन्त रिहा नगरे प्रहरीविरुद्ध संघर्ष थाल्ने चेतावनी दिए । 
मोरङका एसपी जनार्दन जिसीले प्रहरीले आरोपीहरूलाई पक्राउ गरेर कानुनी दायरामा ल्याइसके पनि राजमार्ग अवरुद्ध गरेर सवारीसाधन तोडफोड गरेकोले दुईजना युटुबरसहित ११ जनालाई पक्राउ गरेको बताए । उनले पक्राउ परेकाहरूलाई छानबिन गर्ने र रिपाेर्टिङकै लागि आएको भए पत्रकार राईलाई  थुनामुक्त गर्ने बताए । 

२७ फागुन साँझ चौधरी दाजुभाइले लागुऔषध गाँजा र मद्यपान सेवन गरी १८ महिनाकी नाबालिकाको सामूहिक बलात्कारपछि हत्या गरेका थिए । फागुन २७ गते साँझ साढे ५ बजे बालिका हराएकोे थाहा पाएपछि खोजी गर्ने क्रममा उनी साढे ६ बजे घरनजिकै रहेको  झाडीभित्र  अचेत अवस्थामा फेला परेकी थिइन् । उनलाई उपचार गर्न विराटनगरस्थित नोबेल अस्पताल लगिए पनि उनको राति नै मृत्यु भएको थियो । 

नाबालिका बलात्कार गर्ने दाजुभाइ दुवैजनालाई मोरङ प्रहरीले पक्राउ गरेर अदालतबाट म्याद थप गरी अनुसन्धान गरिरहेको छ ।