निर्वाचनमुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियापन्ध्रौं वार्षिकोत्सव विशेषांकखेलकुदविश्वकोरोना अपडेटप्रवासकर्नर किकसम्पादकीय१३औँ वार्षिकोत्सव विशेषांकसाहित्यस्वास्थ्य र जीवनशैलीफिचरलाेकसेवा१४औँ वार्षिकोत्सव विशेषांकप्रेरक प्रसंगटर्निङ प्वाइन्ट्स-२०२२१२औँ वार्षिकोत्सव विशेषांकसप्तरंगटर्निङ प्वाइन्ट्स-२०२०टर्निङ प्वाइन्ट्स-२०१९प्रदेशब्लगEnglish
  • वि.सं २०७९ श्रावण २४ मंगलबार
  • Tuesday, 09 August, 2022
नयाँ पत्रिका काठमाडौं
२०७८ फाल्गुण १९ बिहीबार ११:५८:००
Read Time : < 1 मिनेट
समाचार डिजिटल संस्करण

पत्रकार पाण्डेको रिहाइका लागि पहल गर्न सरकारसँग महासंघको आग्रह

Read Time : < 1 मिनेट
नयाँ पत्रिका, काठमाडौं
२०७८ फाल्गुण १९ बिहीबार ११:५८:००

नेपाल पत्रकार महासंघले वैदेशिक रोजगारीका सिलसिलामा युएईमा रहेका पत्रकार उमाकान्त पाण्डेको रिहाइका लागि सरकारको ध्यानाकर्षण गराएको छ। उज्यालो रेडियो नेटवर्कमा कार्यरत पत्रकार पाण्डेलाई नेपालमा रहँदा सामाजिक सञ्जालमा लेखिएको स्टाटसलाई लिएर युएई प्रहरीले पक्राउ गरेको छ। उनीविरुद्व त्यहाँको अदालतमा मुद्दा चलेको छ। 

महासंघका अध्यक्ष विपुल पोखरेल, महासचिव रोशन पुरी र केन्द्रीय सदस्य प्रकाश धौलाकोटी सम्मिलित महासंघको टोलीले बिहीबार परराष्ट्रमन्त्री नारायण खड्कालाई भेटेर पत्रकार पाण्डेको रिहाइका लागि नेपाल सरकारको तर्फबाट पहल गरिदिन आग्रह गरेका हुन्।

महासंघले अभिव्यक्ति स्वतन्त्रताको विश्वव्यापी मान्यताविपरीत पत्रकार पाण्डेले सामाजिक सञ्जालमा लेखेकै आधारमा पक्राउ गरी मुद्दा चलाइएको भन्दै त्यसलाई अभिव्यक्ति स्वतन्त्रतामाथिको ठाडो हस्तक्षेप भनेको छ। महासंघका अध्यक्ष पोखरेलले नेपालमा रहँदा लेखेको स्टाटसका आधारमा पत्रकार पाण्डेमाथि दुबईको कानुनबमोजिम दूतावासले कारबाही प्रक्रिया अघि बढाएको भन्दै आपत्ति प्रकट गरे। महासंघका महासचिव पुरीले नेपाली पत्रकार पाण्डेविरुद्व युएईस्थित नेपाली दूतावासले नै मुद्दा लगाउनु आपत्तिजनक भएको बताए।

जवाफमा मन्त्री खड्काले पत्रकार पाण्डेको अवस्थाबारे बुझेर दूतावासमार्फत उनको रिहाइका लागि पहल गर्ने बताए। पत्रकार पाण्डेलाई नेपालमा रहँदा जनवरी ७ (पुस २३ गते) सामाजिक सञ्जालमा भिजिट भिसामा नेपाली राजदूतावासको संलग्नता रहेको भन्ने आशयमा लेखिएको स्टाटसलाई लिएर युएई प्रहरीले पक्राउ गरी साइबर क्राइमको मुद्दा लगाएको थियो। हाल पाण्डे युएई जेलमा छन् ।

उनीविरुद्ध दुबई अदालतले मंगलबार मात्रै तीन महिना कैद र करिब आठ लाख रुपैयाँ जरिवाना हुने फैसला सुनाएको छ। दुबई बसेर नेपाली पत्रकारिता गर्दै आएका पाण्डेलाई सजाय भुक्तानपछि युएई सरकारले देश निष्कासन (डिपोर्ट) गर्नेछ। उनका सबै सामग्री जफत हुने र सामाजिक सञ्जाल फेसबुकसमेत बन्द गरिनेछ। पाण्डेले जरिवानाबापत २० हजार दिराम (सात लाख ९९ हजार चार सय रुपैयाँ) जरिवाना तिर्नुपर्नेछ।