- वि.सं २o७८ फाल्गुण २ सोमबार
आमाको हत्या आरोपमा मोरङकोे उर्लाबारीमा एकजना पक्राउ परेका छन् । उर्लाबारी नगरपालिका– ४ आइतबारेका ३५ वर्षीय गंगाप्रसाद भण्डारी आफ्नी आमा ७० वर्षीया चन्द्रमाया भण्डारीको हत्या आरोपमा पक्राउ परेका हुन् ।
इलाका प्रहरी उर्लाबारीका इन्स्पेक्टर राजाराम खड्काका अनुसार मादक पदार्थ सेवन गरिरहने छोरा गंगाप्रसादले आइतबार अपराह्न साढे चार बजेतिर वृद्धा आमालाई काठको चिर्पट प्रहार गरेर घाइते बनाएका थिए ।
उनको आइतबार राति साढे १० बजेतिर मंगलबारेस्थित मदन भण्डारी अस्पताल तथा ट्रमा सेन्टरमा उपचारका क्रममा मृत्यु भएको थियो । प्रहरीले आमाको हत्या आरोपमा छोरा गंगाप्रसादलाई नियन्त्रणमा लिएर अनुसन्धान थालेको छ । घटनाको कारण अत्यधिक मादक पदार्थ सेवनले निम्त्याएको मानसिक विक्षिप्तता हुन सक्ने प्रहरीको प्रारम्भिक भनाइ छ ।
