दशौँ महाधिवेशनमा एमालेको संस्थापन समूहकै नेताहरू दुई खेमामा बाँडिँदै गएपछि पार्टी अध्यक्ष केपी ओली सर्वसम्मत नेतृत्व चयन गर्ने गृहकार्यमा जुटेका छन् । अध्यक्ष ओलीले महासचिवका आकांक्षी विष्णु पौडेल र शंकर पोखरेलसँग बेग्लाबेग्लै र संयुक्त रूपमा छलफल गरी सहमति जुटाउने कोसिस गरेका छन् ।
महासचिवका दाबेदार पौडेल र पोखरेलबीच सहमति जुटाएर एकजनालाई उपाध्यक्षमा मनाउन ओली लागिपरेको एमाले उच्च स्राेतले नयाँ पत्रिकालाई जानकारी दिएको छ । सौराहास्थित होटेल पार्क सफारीमा अध्यक्ष ओली, पौडेल र पोखरेलबीच छलफल भएको हो ।
उद्घाटन समारोह सुरु हुँदै
केही समयपछि नारायणी नदी किनारमा महाधिवेशन उद्घाटन समारोह सुरु हुँदै छ । महाधिवेशनका लागि देशभरका एमाले नेता–कार्यकर्ता चितवनमा आउने क्रम जारी छ । अहिले बजार क्षेत्र र नारायणी नदी किनार एमाले कार्यकर्ताले भरिँदै गएको छ । बजार क्षेत्रमा अहिले सार्वजनिक सवारी कम चलेका छन् । चारैतिरबाट एमाले कार्यकर्ता चितवन आउने क्रम जारी छ।
