- वि.सं २o७८ असोज २३ शनिबार
जोखिममा रहेको सेतीपोखरी हिमताल संरक्षणको योजना अगाडि बढाइने भएको छ। सोलुखुम्बुको महाकुलुङ गाउँपालिका–३ स्थित मेरापिक र चाम्लाङको फेदीमा रहेको सेतिपोखरी हिमतालको संरक्षणमा युएनडिपीले अग्रसरता लिएको हो।
गाउँपालिका र युएनडिपीबीच शुक्रबार भएको भर्चुअल मिटिङमा हिमताल संरक्षणलाई मूर्त रूप दिने सहमति भएको पालिका अध्यक्ष सागर किराँतीले जानकारी दिएका छन् । ०७२ सालको भूकम्पपछि सेतीपोखरी हिमपहिरोका कारण महाकुलुङ वडा नम्बर १ को गम र सिम्बल्दो गाउँको २४ घर विस्थापित भएका थिए।
करिब ६० करोडको लागतमा गरिने संरक्षण अभियानमा ताललाई निकास दिने, पूर्वसूचना प्रणाली स्थापना गर्ने र बायो इन्जिनियरिङसम्बन्धी कामहरू गरिने परियोजना सहयोग अधिकृत प्रकृति जिसीले जानकारी दिए ।
समुद्री सतहदेखि पाँच हजार २०५ मिटर उचाइमा रहेको उक्त तालको क्षेत्रफल ९५० वर्ग मिटर र गहिराइ २०५ मिटर रहेको छ।
