- वि.सं २o७८ भदौ ३ बिहीबार
प्रदेश २ का प्रदेश प्रमुखमा नियुक्त भएका हरिशंकर मिश्रले पदभार ग्रहण गरेका छन् । बुधबार दिउँसो ४ बजे प्रदेश प्रमुखका सचिवसहित कर्मचारीहरूले प्रदेश प्रमुखलाई पदभार ग्रहण गराएका हुन् । मंगलबार नै राष्ट्रपति विद्यादेवी भण्डारीले मिश्रलाई पद तथा गोपनीयताको शपथ खुवाएकी थिइन् ।
पदभार ग्रहण समारोहमा प्रदेश सरकारका भौतिक पूर्वाधार विकासमन्त्री रामसरोज यादव पनि सहभागी थिए । प्रदेश प्रमुख मिश्रलाई स्वागत गर्न नेपाली कांग्रेसका नेता तथा कार्यकर्ताहरू जनकपुरधामस्थित विमानस्थलमा पुगेका थिए । नवनियुक्त प्रदेश प्रमुख महोत्तरी पिपरा गाउँपालिकानिवासी हुन् ।
यसबीच, पदमुक्त भएका निवर्तमान प्रदेश प्रमुख डा. राजेश झा अहिराजले प्रदेश प्रमुख निवास खाली गरेका छन् । बुधबार बिहानै प्रदेशवासीको नाममा सम्बोधन गर्दै उनले सरकारी निवास छाडेका हुन् । आफ्नो पर्सनल कारमा आफैँले चलाएर उनी मधेस भवनबाट बिदा भएका हुन् । आफूले पाँच महिना २४ दिन प्रदेश प्रमुखको रूपमा काम गरेको र कामको क्रममा आफूहरूलाई सहयोग गर्ने प्रदेशवासी, प्रदेश सरकार तथा कर्मचारीहरूलाई धन्यवाद दिए ।
शिरमा नेपाल मनमा मधेस राखेर आफूले क्षमताले भ्याएसम्म उत्कृष्ट कार्यको प्रयास गरेको उनले बताए । प्रदेश २ अभाव, अपराध र अतिवादको चपेटामा परेको, तर देशभक्तिको सवालमा बलियो रहेको उनको भनाइ थियो । सीमा सुरक्षा, देशभक्त, नागरिकता र भ्रष्टाचारजस्ता विषय सम्झौताको विषय नरहेको कुरा नागरिक र सरोकारवालालाई प्रस्ट्याउँदै जानु अहिलेको आवश्यकता रहेको उनले बताए ।
विभेदको विरुद्धमा लड्नेहरूले नै विभेदलाई नै निरन्तरता दिनु चिन्ताको विषय रहेको भन्दै उनले भने, ‘प्रदेश २ सरकार अझै समावेश हुन सकेको छैन, प्रदेश २ मा हरेक जातजाति धर्म, वर्गका व्यक्तिहरूको बसोवास छ, त्यसकारण यी विविधतामा एकता खोज्नु अहिलेको आवश्यकता छ ।’
