- वि.सं २o७८ श्रावण १८ सोमबार
दाङको राप्ती स्वास्थ्य विज्ञान प्रतिष्ठानलाई मेडिकल कलेजका लागि जग्गा प्रदान गर्ने निर्णय भएको छ । घोराही उपमहानगरपालिका– १० नारायणपुरस्थित सिद्धरत्ननाथ नमुना मावि नारायणपुरको २० बिघा जग्गा प्रदान गरिएको हो ।
दाङका प्रमुख जिल्ला अधिकारी रामबहादुर कुरुम्बाङका अनुसार प्रतिष्ठानलाई मेडिकल कलेज सञ्चालनका लागि सो जग्गा उपलब्ध गराउने निर्णय भएको हो । योसँगै जिल्लामा एमबिबिएस र एमडीको अध्ययनका लागि प्रक्रिया अघि बढ्ने कुरुम्बाङकाे भनाइ छ ।
विद्यालय व्यवस्थापन समितिका अध्यक्ष दीपक पाण्डेका अनुसार समग्र राप्तीको मेडिकल शिक्षालाई व्यवस्थित गर्न महत्वपूर्ण भूमिका रहन सक्ने भन्दै विद्यालयको जग्गा प्रदान गरिएको हो ।
यसअघि जग्गाको टुंगो नलाग्दा मेडिकल शिक्षाको काम अघि बढ्न सकेको थिएन । अब भौतिक पूर्वाधारको काम अघि बढ्ने प्रतिष्ठानका प्रमुख सल्लाहकार नारायण भुसालले बताए ।
