- वि.सं २o७८ श्रावण ७ बिहीबार
राष्ट्रिय सभा सदस्य रामनारायण बिडारीले निवर्तमान प्रधानमन्त्री केपी ओलीलाई नेकपा एमालेको घोषणापत्र सम्झाएका छन् । राष्ट्रिय सभाको बिहीबार बसेको बैठकमा उनले ओलीका कदमहरूमाथि कटाक्ष गरे ।
बैठकमा बिडारीले प्रश्न गरे, ‘चुनावको वेलाको घोषणापत्रमा संसद् विघटन गर्छु भनेर लेखेको थियो ? संवैधानिक परिषद्लाई छिन्नभिन्न–टुक्राटुक्रा–क्षतविक्षत पारिदिन्छु भनेर लेखेको थियो घोषणापत्रमा ? संविधानको सुनुवाइको धारा निष्क्रिय पारिदिन्छु भनेर लेखेको थियो, त्यो वेलाको त्यो पार्टीको त्यो मान्छेको त्यो नेताले ? मनपरी ढंगले मन्त्रिपरिषद् बनाउँछु, कहिले ऐरेलाई बनाउँछु, कहिले गैरेलाई बनाउँछु, कहिले बाटो हिँड्नेलाई बनाउँछु, कहिले सांसदलाई बनाउँछु, म त मनलागी ढंगले मन्त्रिपरिषद् बनाउँछु भनेर लेखेको थियो ? जथाभावी मनलाग्दी खर्च गर्ने भनेर लेखेको थियो ? बजेट आफैँले आफैँमा पेस गर्छु भनेर लेखेको थियो ?’
