सञ्चारकर्मीद्वय बन्दना खड्का र प्रज्ज्वल शाक्य गायन क्षेत्रमा पनि प्रवेश गरेका छन् । झन्डै दुई दशकदेखि सञ्चारकर्म गर्दै आएका खड्का र शाक्यले ‘मायाको परिभाषा’ बोलको गीतमा स्वर दिएका छन् । राजकुमार रायमाझीको शब्द र संगीत रहेको गीतले मायामा जातीय आधारमा हुने विभेदलाई बोलेको छ ।
भिडियोमा प्रतिश शाक्य, प्रयुक्ता केसी, बिगेन तुलाधर, सरला सिलवाल, अम्बिका राईलगायतलाई फिचरिङ गरिएको छ । साथमा गायकद्वय शाक्य र खड्कालाई पनि देख्न सकिन्छ । सोहन मानन्धरको छायांकन र सम्पादन रहेको म्युजिक भिडियो आराध्यलक्ष्मी खड्गीले सहनिर्देशन गरेकी हुन् ।
राजधानीमा आयोजित एक कार्यक्रममा नेपाल पत्रकार महासंघका अध्यक्ष विपुल पोखरेलले म्युजिक भिडियो सार्वजनिक गरे । पोखरेलले सञ्चारकर्मीहरूको गायनयात्राको प्रशंसा गरे ।