खेलकुद

रोनाल्डोद्वारा सर्वाधिक अन्तर्राष्ट्रिय गोलको कीर्तिमान बराबरी

विश्वकप विजेता फ्रान्सविरुद्ध दुई पेनाल्टी गोल गर्दै आफ्नो देशलाई जारी युरोकपको प्रिक्वार्टरफाइनल चरणमा पुर्‍याएका पोर्चुगलका कप्तान क्रिष्टियानो रोनाल्डोले आफ्नो नाममा थप व्यक्तिगत कीर्तिमान पनि थपेका छन् । 

फ्रान्सविरुद्ध दुई गोल गरेसँगै उनले राष्ट्रिय टोलीबाट सर्वाधिक १०९ गोल गर्ने इरानका अली दाइको कीर्तिमान बराबरी गरेका छन् । अलीले सन् १९९३–२००६ को अवधिमा यो कीर्तिमान कायम गरेका थिए । 

आगामी प्रतिस्पर्धामा राष्ट्रिय टोलीबाट थप गोल गर्न सके रोनाल्डोले यो कीर्तिमानमा आफ्नो एक्लो नाम लेखाउनेछन् । अन्तर्राष्ट्रिय पुरुष फुटबलमा अहिलेसम्म ९० भन्दामाथि गोल गर्ने खेलाडी रोनाल्डो र अली मात्रै हुन् । 

रोनाल्डोको गोल
३१ – युरोपियन च्याम्पियनसिप छनोट
३१ – विश्वकप छनोट
१९ – मैत्रीपूर्ण खेल
१४ – युरोपियन च्याम्पियनसिप
७  – विश्वकप
५  – युइएफए नेसन्स लिग
२  –कन्फिडेरेसन कप

रोनाल्डोले अहिलेसम्म गरेको गोलमध्ये आधा गोल खेलको अन्तिम ३० मिनेटमा सम्भव भएको छ । उनले खेलको अन्तिम १५ मिनेटमा ३१ गोल गरेका छन् । यस्तै खेलको ६१औँ देखि ७५औँ मिनेटको बीचमा उनले २२ गोल गरेका छन् ।

रोनाल्डोले खेलको १६ देखि ३० मिनेटभित्र १७, ३१ देखि ४५ मिनेटभित्र १६, पहिलो हाफको सुरुवाती १५ मिनेटमा ११ र दोस्रो हाफको सुरुवाती १५ मिनेटभित्र १२ गोल गरेका छन् । उनले गरेको मध्ये झन्डै ८९ गोल डी बक्सको भित्रबाट सम्भव भएको छ । उनले १४ गोल पेनाल्टीमार्फत र नौ गोल फ्रिकिकमार्फत गरेका छन् । उनले लिथुनिया र स्विडेनविरुद्ध सर्वाधिक सात–सात गोल गरेका छन् । बुधबारको खेलअघि उनले फ्रान्सविरुद्ध कहिल्यै गोल गरेका थिएनन् ।

जर्मन क्लब बार्यन म्युनिखबाट समेत खेलेका इरानका अलीले सन् २००३ मा हंगेरीका फेरेन्क पुस्कासको ८५ गोलको कीर्तिमान तोडेका थिए । रोनाल्डोले त्यही वर्ष अन्तर्राष्ट्रिय फुटबलमा डेब्यु गरेका हुन् । बुधबार राति रोनाल्डोले हंगेरीको बुडापेस्टस्थित फेरेन्क पुस्कास एरेनामै फ्रान्सविरुद्ध दुई गोल गर्दै अलीको कीर्तिमान बराबरी गरे ।