मुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियाखेलकुदविश्वप्रवासकोरोना अपडेटकर्नर किकसम्पादकीयस्वास्थ्य र जीवनशैली१३औँ वार्षिकोत्सव विशेषांकसाहित्यफिचरलाेकसेवा१४औँ वार्षिकोत्सव विशेषांकप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०१९टर्निङ प्वाइन्ट्स-२०२०प्रदेशब्लगEnglishटर्निङ प्वाइन्ट्स-२०२१
  • वि.सं २०७८ श्रावण १५ शुक्रबार
  • Friday, 30 July, 2021
नयाँ पत्रिका काठमाडौं
२०७८ जेठ ३१ सोमबार २१:०४:००
Read Time : < 1 मिनेट
मुख्य समाचार डिजिटल संस्करण

देउवा–प्रचण्ड–नेपाल वार्ता : गठबन्धनलाई थप सशक्त बनाउनेबारे छलफल

Read Time : < 1 मिनेट
नयाँ पत्रिका, काठमाडौं
२०७८ जेठ ३१ सोमबार २१:०४:००

विपक्षी गठबन्धनका शीर्ष नेताहरू गठबन्धनलाई थप सशक्त बनाएर अघि बढ्ने भएका छन् । प्रधानमन्त्री केपी ओलीका असंवैधानिक र अलोकतान्त्रिक कदमविरुद्ध संविधान र लोकतन्त्रको रक्षा गर्न भन्दै बनेको विपक्षी गठबन्धनले एकपछि अर्को सफलता प्राप्त गरिरहेका वेला शीर्ष नेताहरूले थप सशक्त र विश्वासको वातावरण बनाएर अघि बढ्ने सहमति गरेका हुन् । 

छलफलका लागि सोमबार साँझ कांग्रेस सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ एमाले वरिष्ठ नेता माधवकुमार नेपालको निवास कोटेश्वर पुगेका थिए । नेताहरूबीच साँझ साढे ५ बजेदेखि एक घन्टासम्म छलफल भएको थियो । छलफलमा कांग्रेसका महामन्त्री पूर्णबहादुर खड्का पनि सहभागी थिए । 

सरकारका गलत गतिविधिविरुद्ध निरन्तर खबरदारी गर्दै आएको गठबन्धनका नेताहरूबीच पछिल्ला राजनीतिक घटनाक्रम र सरकारका कमीकमजोरीबारे छलफल भएको खड्काले जानकारी दिए । ‘समसामयिक राजनीतिक घटनाक्रम, सर्वोच्च अदालतमा विचाराधीन मुद्दा र सरकारका गतिविधिको समीक्षा भयो । संविधान र लोकतन्त्रको रक्षाका निम्ति जुन विपक्षी गठबन्धन बनेको छ, त्यसलाई कसरी थप सशक्त बनाएर अघि बढ्ने भन्नेमै छलफल केन्द्रित भयो,’ खड्काले नयाँ पत्रिकासँग भने । 

विपक्षी गठबन्धन बनेपछि प्रायजसो बैठक बुढानीलकण्ठस्थित देउवाको निवासमा हुने गरेका थिए । पछिल्लोपटक सर्वोच्च अदालतको फैसलाले नेकपा एमालेको विवादमा कस्तो मोड ल्याउला भनेर अड्कलबाजी भइरहेका वेला देउवा आफैँ नेपालनिवासमा पुगेर भेटवार्ता गरेका हुन् । 

विपक्षी गठबन्धनले प्रतिनिधिसभाको विघटन गर्ने निर्णय बदर गर्न र संविधानको धारा ७६ (५) बमोजिम देउवालाई प्रधानमन्त्री बनाउन माग गर्दै सर्वोच्च अदालतमा रिट हालेका छन् । सो मुद्दामा आगामी ९ असारदेखि निरन्तर बहस हुँदै छ ।