कञ्चनपुरको एक इँटाभट्टामा दैनिक ज्यालादारीमा कार्यरत बालकको मृत्यु भएको छ । गएराति भीमदत्त नगरपालिका– ८ तिलाचौरस्थित जगदम्बा इँटाभट्टामा कार्यरत १३ वर्षीय बालक अर्जुन पुजाराको मृत्यु भएको हो ।
जिल्ला प्रहरी कार्यालय कञ्चनपुरका प्रहरी निरीक्षक लालबहादुर बमले कोइला पिस्ने मेसिनमा परी बालकको मृत्यु भएको बताए । भीमदत्त नगरपालिका– १० तिलाचौरका बालक सिद्धनाथ माध्यमिक विद्यालय कक्षा ८ मा अध्ययनरत थिए । कोइला पिस्ने मेसिनमा बालकको टाउको र शरीर अलग भएको छ ।
लकडाउनका कारण विद्यालय बन्द भएपछि बालक इँटाभट्टामा सातादेखि दैनिक ज्यालादारीमा काम गर्दै आएको प्रहरीले जनाएको छ । मृतक परिवार, स्थानीयले भने इँटाभट्टाजस्तो गम्भीर प्रकृतिका भारी काममा बालकलाई मजदुरीका लागि काममा खटाएर बालश्रम शोषण गरेको भन्दै सञ्चालकमाथि कारबाहीको माग अघि सारेका छन् । बालकलाई श्रममा लगाउनेमाथि कारबाहीको माग अघि सार्दै स्थानीयले इँटाभट्टा घेराउ गर्दै विरोध गरेका थिए ।
मृतक बालकको शव महाकाली अस्पतालमा ल्याइएको छ । तर, मृतक पीडित पक्षले भने दोषीउपर कारबाही नहुँदासम्म शव नबुझ्ने अडान लिएका छन् । जिल्ला प्रहरी कार्यालय कञ्चनपुरले घटनाको थप अनुसन्धान भइरहेको जनाएको छ ।