०७६ मंसिरबाट हुम्लाको उत्तरी नाका हिल्सा बन्द हुँदा विकास निर्माणको काम प्रभावित भएको छ । उत्तरी चीन र नेपालसँग जोडिएको हुम्लाको हिल्सानाका बन्द भएपछि निर्माण सामग्री आउन सकेको छैन । जसले गर्दा विकास निर्माणको काम प्रभावित भएको हो ।
मंसिरदेखि फागुनसम्म हिमपात र चैत महिनादेखि कोरोना महामारीका कारण नाका बन्द छ । नाका ठप्प हुँदा दैनिक उपभोग्य वस्तु, विकास निर्माणका सामग्री र मजदुरीसमेत प्रभावित देखिएको छ ।
चीन र नेपालको मैत्रीपूर्ण लगानी रोकिँदा साना, मझौला, ठूला व्यवसाय आर्थिक संकटको घेराबन्दीमा परेको हुम्ला उद्योग वाणिज्य संघका अध्यक्ष नाम्ग्याल तामाङले जानकारी दिए । एकातिर नाका नखुलेपछि विकास निर्माणका कामसमेत प्रभावित भएको छ भने अर्काेतर्फ कर्जाको ब्याजदरले सताउने गरेको अध्यक्ष तामाङले बताए । वर्षाैँदेखि नाका बन्द हुँदा होटेल व्यवसायीले ठूलो घाटा व्यहोर्नुपरेको नाम्खा गाउँपालिकाका स्थानीय छेपेल लामाले बताए ।
सीमा क्षेत्रमा रहेका व्यवसायीको कारोबार र आयात–निर्यातमा समस्या भएको लामाको भनाइ छ । हिल्सानाका बन्द भएसँगै व्यवसाय ठप्प हुँदा राजस्वमा घाटा हुनुका साथै उपभोक्तासमेत मर्कामा परेका छन् । सरोकारवाला निकायले चासो नदेखाएपछि वर्षाैँसम्म नाका ठप्प भएको स्थानीय व्यवसायीको गुनासो छ ।