- वि.सं २o७७ चैत २४ मंगलबार
चलचित्र निर्देशक तथा कलाकार दीपाश्री निरौला र अभिनेता सरोज खनालको फेसबुक पेज ह्याक गरी फिरौती माग्ने १४ वर्षीय किशोरलाई प्रहरीले पक्राउ गरेको छ । नेपाल प्रहरीको साइबर ब्युरोबाट खटिएको प्रहरी टोलीले ती किशोरलाई मंगलबार पर्साको वीरगन्जबाट पक्राउ गरेको हो ।
प्रहरीका अनुसार उनले अनाधिकृत रूपमा पेजमा प्रवेश गरी रकम माग्दै आएका थिए । विशेषगरी, कलाकारद्वयकै पेजमा आबद्ध भएकाहरूसँग उनले रकम मागेका थिए । उनले धम्कीपूर्ण सन्देश पनि पठाएका थिए ।
ब्युरोका प्रवक्ता एसएसपी नवीन्द अर्यालले किशोरले धम्कीपूर्ण सन्देश पठाई रकम माग्दै आएको अनुसन्धानबाट देखिएको बताए । उनले भने, ‘१४ वर्षको केटोले फेसबुक पेज ह्याक गरेको छ । पेजमा भएकाहरूसँग रकम माग गरेको छ । यसका लागि धम्कीपूर्ण सन्देश पठाएको छ । घटनाको सम्बन्धमा थप अनुसन्धान हुँदै छ ।’
प्रहरीका अनुसार निरौला र खनालले पेज ह्याक भएको थाहा पाएपछि उजुरी दिएका थिए । सोही कारण किशोरले रकम भने कसैसँग पनि लिन नसेको प्रारम्भिक अनुसन्धानबाट देखिएको अर्यालले बताए ।
अर्यालले भने, ‘घटना अपत्यारिलो छ । यसका पछि अन्य कोही पनि हुन सक्छ । त्यो कोणबाट पनि अनुसन्धान अघि बढेको छ । अहिलेसम्म हेर्दा रकम भने कसैबाट पनि असुल्न भ्याएको पाइएको छैन ।’
